Qazaqistan metbu'atida exmetjan qasimi qatarliqlarning qazasining 68 yilliqi xatirilendi

Muxbirimiz ümidwar
2017-09-03
Élxet
Pikir
Share
Print

Qazaqistan Uyghur metbu'atida 1944-1949-yillardiki milliy azadliq inqilab rehberliridin exmetjan qasimi qatarliqlarning qazasining 68 yilliqi munasiwiti bilen maqale élan qilindi.

Qazaqistanda chiqidighan "Uyghur awazi" gézitining yéngi sanida 1949-yili, 27-awghust küni ,1944-1949-yilliridiki milliy azadliq inqilab rehberliridin exmetjan qasimi, isaqbeg munonof qatarliqlarning ayropilan qazasigha uchrash mesilisi heqqide bir parche maqale élan qilin'ghan bolup, maqale aptori zhurnalist yadigar sabitof öz maqalisini yézishta yéqinda rusiyede élan qilin'ghan exmetjan qasimi qatarliqlarning ölümi heqqidiki bir qisim maqale -uchurlarni asas qilghan.

Yadigar sabitof rusiyening buryatiye jumhuriyitining intérnét torida élan qilin'ghan rusiye zhurnalisti botajap radnayéwning "Sherqiy türkistan jumhuriyiti rehberlirining buryatide halak bolushi" mawzuluq maqalisidiki uchurlar asasida exmetjan qasimi qatarliqlar olturghan ayropilanning buryatiye jumhuriyiti tewesidiki kaban téghigha chüshüp ketkenlikini eslitip ötken.

Tarixi uchurlardin melum bolushiche, xitay hökümet metbu'atliri exmetjan qasimi qatarliq 8 kishining béyjingda échilidighan memliketlik siyasiy kéngesh yighinigha qatnishish üchün yolgha chiqip, 1949-yili, 27-awghust küni bayqal köli boyidiki irkutsky shehirige yéqin jayda ayropilan qazasigha uchrap hayatidin ayrilghanliqini resmiyleshtürgen idi. Hazirghiche exmetjan qasimi qatarliqlarning irkutsky, chita qatarliq jaylarda ayropilan hadisisige uchrighanliqi éytilghan, biraq, rusiyede élan qilin'ghan bir qisim yéngi intérnét maqale-uchurlirida körsitilishiche, exmetjan qasimi qatarliqlar, bayqal köli boyidiki buryatiye jumhuriyitining kaban téghida qazagha uchrighan. Yadigar sabitof maqalisini mezkur uchurlar shuningdek seypidin ezizning eslimisidiki uchurlar bilen sélishturup yézip chiqqan.

Wehalenki, aptor hazirghiche exmetjan qasimi qatarliqlarning qazasining orni we ularning ölümi heqqide her xil qarashlar dawamliship kélin'genlikini qeyt qilghan.

Tarixi uchurlardin melum bolushiche, exmetjan qatarliqlar jesetliri 1950-yili, féwralda maw bilen stalin sowét-xitay dostluq kélishimini tüzüp bolghandin kéyin, sowét ittipaqidin ghuljigha élip kélinip, depne qilin'ghan idi.

Toluq bet