Exmetjan qasimi, is'haqbék munonof qatarliqlar bilen birge qaza qilghan abduréshit imin xatirilendi

Muxbirimiz ümidwar
2017-10-16
Élxet
Pikir
Share
Print

1949-Yili, 8-ayda milliy azadliq inqilab rehberliri exmetjan qasimi qatarliqlar bilen bir qatarda qazagha uchrighuchilardin biri, jümlidin exmetjan qasimi bashchiliqidiki ömekning terjimani we muxbiri abduréshit imin tughulghanliqining 95 yilliqi we uning qazasining 68 yilliqi xatirilinip, mexsus maqale élan qilindi.

Xitay we sowét ittipaqi hökümetliri teripidin xitayning béyjing shehiride échilidighan siyasiy kéngeshning yighinigha qatnishish üchün yolgha chiqip, 1949-yili, 27-awghust küni sowét ittipaqining bayqal köli etrapida ayropilan qazasigha uchridi, dep élan qilin'ghan exmetjan qasimi, is'haqbék munonof, delilqan sugurbayéf, abdukérim abbasof qatarliq 8 kishilik guruppa ichide abduréshit imin, ghéni kerimof, osmanjan nasir qatarliq xadimlarmu bar bolup, bularning aridiki abduréshit imin 20-esirning birinchi yérimidiki közge körün'gen Uyghur edibliri we zhurnalistlirining biri idi.

"Uyghur awazi" gézitide élan qilin'ghan zhurnalist yadikar sabitofning abduréshit imin heqqidiki mexsus xatire maqaliside qeyt qilinishiche, abduréshit imin 1922-yili, qorghastiki xonxay mazar kentide tughulghan bolup, uning dadisi eyni waqittiki "Ili tarixi" namliq kitabning aptori, yeni "Imin tarix" dep atalghan ataqliq Uyghur tarixchisi iminjan bawudun idi. Abduréshit imin 1935-1941-yilliri ghuljida xitay tilidiki mektepte we "Ili gimnaziyesi" ning xitay tili sinipida oqughan bolup, u eyni waqittiki sani az xitay tili bilidighan Uyghur ziyaliylirining biri idi. U milliy inqilab bashlan'ghanda ghuljidiki "Azad sherqiy türkistan" gézitide muxbir bolup xizmet qilghan. 1945-1946-Yilliri arisida sherqiy türkistan jumhuriyiti terep bilen xitay gomindang hökümiti arisidiki tinchliq söhbiti jeryanida öz teripining terjimani bolup xizmet qilghan. Abduréshit imin 1944-1949-yilliri arisida köpligen shé'ir we hékayilerni yézip élan qilghan shuningdek "Küresh ilhamliri" namliq toplimini qaldurghan. 

Abduréshit imin qazagha uchrighanda 27 yashta idi.

Toluq bet