Өктичи сәнәткар әй вейвей тәқибтики һаятиниң көрүнүшини 6 данә төмүр сандуқта көргәзмә қилди

Хитай өктичи сәнәткар әй вейвие хитай даирилириниң тәқиби астидики һаятини әкс әттүридиған мум һәйкәлләрни 6 данә чоң типтики датлашқан төмүр сандуқ ичигә қачилап чиқип, уни венитсийидә өткүзүлгән бир гүзәл сәнәт фестивалиға қатнаштурған.

Фестивални зиярәт қилғучилар худди картон өйләргә охшайдиған бу төмүр сандуқлар ичигә қариғинида, әмәлийәттә хитайниң диктатор түзүмини көрүвалалайдикән. Әй вейвие узунлуқи бир йерим метир, кәңлики үч йерим метир келидиған бу төмүр қутиға өзи тамақ йәватқан, ухлаватқан, һаҗәт қиливатқан, мунчиға чүшүватқан вақитлирида бешида қарап турған хитай сақчилириниң мум һәйкәллирини орнатқан.

Һәр бир қутиға айрим-айрим қилип қоюлған бу көрүнүшләрни көргән зиярәтчиләр наһайити асанла әй вейвейниң 2011-йили 81 күн хитай даирилири тәрипидин қамап қоюлғанда бешидин өткүзгәнлирини көрүвалалайдикән.

Фирансийә агентлиқиниң хәвәр қилишичә, әй вейвей паспорти техичә хитай даирилири тәрипидин тутуп турулуватқанлиқи үчүн фестивалға қатнишалмиған болсиму, әмма униң әсири өзгичилики билән фестивал тамашибинлириниң алқишиға еришкән. Мәзкур фестивал директори грәг һилтий “әй вейвейниң бешидин өткәнләр наһайити ечинишлиқ. Униң бу әсири һәм бир шәхси баян, һәм бир сиясий баян. Бу, бир кишиниң өз кимликини издиши дегәнликтур” дегән.

Униң үстигә, бу әсәрниң вентсийидики бир католик черкавида көргәзмигә қоюлушиму диққәт қилишқа әрзийдиған бир нуқта болуп, у хитай һөкүмитиниң католик черкави билән болған йирик мунасивәтлиригә қилинған бир ишарәт һесаблинидикән.