Хитай даирилири әйдиз паалийәтчисиниң б д т әйдиз йиғиниға қатнишишини чәклигән
2014.10.24
Хитай әйдиз паалийәтчиси ваң чюйүнниң пәйшәнбә күни билдүрүшичә, хитай аманлиқ даирилири униң паспортини тартивелип, униң җәнвәдә ечилидиған б д т ниң аялларни кәмситишкә қарши туруш йиғиниға қатнишишини чәклигән.
Ваң чюйүн б д т йиғинида, хитайниң “аялларни кәмситишкә хатимә бериш әһдинамиси” ни иҗра қилиш әһвали һәққидә доклат бәрмәкчи иди.
Бирақ, хитай сақчи органлири йеқинда хенәндә олтурушлуқ мәзкур аял паалийәтчиниң паспортини тартивелип, униң у олтурушлуқ хебей шәһиридин айрилишини чәклигән. Бу қетимлиқ хәлқара йиғин уюштурғучилириға өзиниң “кесәл сәвәблик” йиғинға қатнишалмайдиғанлиқини ейтишни тәләп қилған.
У “вашингтон почта гезити” гә қилған сөзидә, “мән сақчиларға вә башқа һөкүмәт әмәлдарлириға нәччә қетим аял әйдиз бимарлириға, кәмситишкә учраватқан ата-аниси әйдиз бимари балиларға ярдәм қилиш һәққидә сөзләйдиғанлиқини чүшәндүргән болсамму, бирақ немишқа бу ишниң йүз беридиғанлиқини билмидим” дегән.
Даириләр ваң чюйүнниң хәлқара йиғинға қатнишишини чәкләштин 2-3 күн аввал, хитай рәиси ши җинпиңниң аяли пең лийүән бейҗиңда ечилған мәмликәтлик әйдиз йиғинида сөз қилип, әйдиз бимарлирини кәмситишкә қарши турушни вә иҗтимаий адаләтни алға сүридиғанлиқини тәкитлигән иди.