Түркийә милләт вәкили фахрәттин йоқуш хитай әлчиханисиға тухум атқанлиқини иптихар билән тилға алди

Мухбиримиз шөһрәт һошур
2019-11-29
Елхәт
Пикир
Share
Принт

29-Ноябир күни түркийә парламентида чиққан бир талаш-тартишта «ийи» партийәсиниң вәкили фахрәттин йоқуш өзиниң аммивий тәшкилатларда вәзипә өтәватқан мәзгилидә давамлиқ шәрқий түркистанлиқлар билән бир сәптә турғанлиқи вә намайишларда хитай әлчиханисиға қаритип тухум атқанлиқини иптихар билән тилға алди.

Хәвәрләрдин мәлум болушичә, фахрәттин йоқуш 29-ноябирдики йиғинда һөкүмәтниң уйғур мәсилисидә сүкүт қиливатқанлиқини тәнқид қилған. Қолида «хитайниң пули мусулман дунясиниң еғизини тувақлиди» мавзулуқ мақалә бесилған «қарар» гезитини тутуп туруп сөзлигән фаһрәттин йоқуш 29-ноябир хитайниң аталмиш кишилик һоқуқ комиссийониниң түркийә парламенти кишилик һоқуқ комессийонини зиярәт қилғанлиқи, әмма икки тәрәп сөһбити давамида кишилик һоқуқ әмәс, бәлки тиҗарәт тимисида сөз болунғанлиқини тилға алди. У бүгүнки йиғинда түркийән немә үчүн пулға сетилған мусулман дөләтлири қатаридин орун алидиғанлиқини сорақ қилған.

Йиғинда ақ партийәниң бир вәкили фахрәттин йоқушниң түркийә парламенттдики «хитай достлуқ гурупписи» ниң әзаси икәнликини әслитип өткәндә бир мәйдан һарарәтлик талаш-тартиш келип чиққан. Фахрәттин йоқуш әпәнди өзиниң мәзкур «достлуқ гурупписи» ға хитай тәрәптин уйғурларға селиватқан зулумлар һәққидә һесаб сораш үчүн киргәнликини вә болуп өткән йиғинларда бу дегинини қилғанлиқини оттуриға қойған вә өзиниң шәрқий түркистан мәсилисидики тәврәнмәс мәйданини пакитлар билән әслитип өткән. 
Т р т ниң 29-ноябирдики хәвиридә дейилишичә, түркийә парламенти кишилик һоқуқ комиссийониниң башлиқи хақан чавушоғлу хитай тәрәп билән бүгүнки сөһбитидә уйғур вәзийити һәққидә йеқинда ашкариланған хәвәрләр тоғрулуқ изаһат беришни сориған. У қарши тәрәпни уйғур районини хәлқара органларниң тәкшүрүшигә йол қоюшқа һәмдә түркийәгә нисбәтән пикир вә учурда очуқ болушқа дәвәт қилған.

Пикирләр (0)
Share
Толуқ бәт