Shadi hamid: "Amérikaliqlar fashizimning némilikini untup qéliwatidu!"

Muxbirimiz eziz
2020-10-26
Élxet
Pikir
Share
Print

Xitay hökümitining Uyghurlarni basturushi bir qisim mutexessislerning qelimide fashizimning tekrarlinishigha oxshitiliwatqanda, amérika jama'etchilikining fashizim chüshenchisidiki mesililer yene bir qétim kishiler diqqitige sunuldi. "Atlantik" torida 25-öktebirde élan qilin'ghan bu heqtiki obzorda "Broking aqillar merkizi" ning xadimi shadi hamid bu mesilini tepsiliy muhakime qildi.

Aptorning körsitishiche, bu yil iyun aylirida amérika kéngesh palatasining ezasi tom katton herqaysi shitatlarda malimanchiliqqa aylinip kétiwatqan "Qara tenliklerning jénimu jan" herikitini kontrol qilish üchün amérika herbiy qisimlirini ishqa sélish lazimliqi heqqidiki bash maqalisini élan qilghandin kéyin, amérikadiki bir qisim kishiler tushmutushtin uni "Fashist" dep eyibligen.

Aptor bu mesile heqqide toxtilip: "Hazir hökümetning herbiy qoshun arqiliq öktichilerni retke sélishi herqachan bir qisim kishilerning neziride 'fashizim' déyiliwatidu," deydu. Shuningdek "Eger siz tom kattonni mushuninggha qarapla fashist, dep qarisingiz u halda sizni fashistning némilikini bilmeydiken, dések bolidu" deydu.

Aptor bir qisim amérika jama'itining amérika hökümiti jiddiy ehwalda ishqa salghan mushu xildiki tedbirler tüpeylidin donald tramp hökümitini fashizimliq bilen shughullandi, dep qarawatqanliqini keskin tenqid qilidu. Shuningdek néme üchün bu kishilerning xongkongdiki tinchliq namayishini basturghan xitay saqchilirini "Fashist" démeydighanliqigha so'al qoyidu. U yene hazir Uyghur diyaridiki köplep melum boluwatqan lagérlar we milyonlighan kishilerning bu lagérlargha qamilishi, shuningdek bu lagérlardiki jismaniy qiynaq, ölüm hadisiliri we bashqa fashizimliq xaraktérdiki basturushlarning heqiqiy menidiki fashsitliq bolidighanliqini körsitidu.

Toluq bet