Fatax emeldari: “Shinjangdiki güllen'gen hayat gherbning xitaygha qilghan töhmitining xata ikenlikini ispatlidi”

Shinxu'a agéntliqining 10-ayning 16-künidiki xewiride körsitilishiche, pelestin milliy azadliq herikiti, yeni fatax inqilabi komitéti ezasi bassam zakarnih (Bassam Zakarneh) “Shinjangdiki güllen'gen hayat gherbning xitaygha qilghan töhmitining xata ikenlikini ispatlidi” dégen.

Bassam zakarnih xitayning “Shinjang Uyghur aptonom rayonidiki kishilerning turmushining yaxshi ikenliki” ni we gherbning xitayning “Shinjang” siyasitige qaratqan “Töhmetlirining qayil qilarliq emesliki” ni körsetken.

 Fataxning mezkur yuqiri derijilik emeldari bassam zakarnih bu sözlerni shinxu'a agéntliqining ziyaritini qobul qilghanda éytqan. U yene mundaq dégen: “Bu rayondiki her millet xelqi inaq yashaydiken we bir-birini nahayiti hörmet qilidiken”.

Bassam zakarnih sözide xitay hökümitining Uyghurlargha qaratqan siyasitini irqiy qirghinchiliq we insaniyetke qarshi jinayet dep eyibligen amérika we bashqa gherb memliketlirini tenqid qilip, xitay bilen birdek meydanini ipade qilip: “Men yéqinda shinjanggha ziyaretke bardim, shinjangdiki her millet xelqi bextiyar hayat ichide diniy étiqad erkinlikidin toluq behrimen boluwatidu. Amérika we bashqa gherb döletlirining shinjang siyasitini bahane qilip xitaygha qara chaplishining asasi yoq”.

Yéqinda pelestin rehbiri yasir arafat qurghan fatax, yeni pelestin milliy azadliq herikiti inqilabi komitéti we pelestin xelq küresh fironti qatarliq ereb döletliri siyasiy partiyeliridin teshkillen'gen wekiller tekshürüsh ömiki Uyghur élige teklip qilin'ghan we ma shingrüy ularni ürümchide kütüwalghan. Ma shingrüy ömek ezaliri bilen söhbet ötküzgende ulargha mundaq dégen: “Bu ömektikilerning ziyaret we ékskursiyeliri dawamida shinjangning ehwalini choqum téximu etrapliq we chongqur chüshinip, xelq'ara jem'iyetke tinch-inaq, hayatiy küchke tolghan güzel shinjang hékayisini sözlep bérishini qarshi alimiz”.