Федерал тәкшүрүш идариси(FBI) хадими америкини хитайдин келиватқан йошурун хәвпкә диққәт қилишқа чақирған

Мухбиримиз сада
2018-12-13
Share

Йеқинда америка федерал тәкшүрүш идариси(FBI) ниң ярдәмчи директори бил пристәп америка һөкүмитиниң хитайдин келиватқан йошурун тәһдитләргә сәл қараватқанлиқидин қаттиқ һәйран қалғанлиқини билдүрүп, буниңға қарита чоқум бир һәрикәт қоллиниш лазимлиқи һәққидә чақириқ қилған.

Америка радио ширкитиниң 12-декабирдики хәвиридин қариғанда, өткән алтә ай мабәйнидә америкидики ахбарат васитилиридә нәччә йүзлигән мақалә елан қилинип, хитайдин келиватқан тор җасуслуқи тәһдитини әкс әттүргән.

Бил пристәп америка сенаторлири уюштурған тәптиш комитетиниң гуваһлиқ бериш йиғинида сөз қилип, “бу хил тор җасуслуқи тәһдити бүгүнки күндә биз учраватқан әң еғир тәһдит. Бу мәсилә кәлтүрүп чиқиридиған ақивәт пәқәтла америкиниң кәлгүси болмастин, бәлки пүтүн дуняниң кәлгүси болуп қалиду,” дегән.

Бил пристәп вә америкиниң башқа икки нәпәр алий дәриҗилик хадими хитайниң қанунлуқ вә қанунсиз йоллар арқилиқ америкиниң йеңилиқлирини қолға кәлтүрүштәк қорқунчлуқ урунушини тәпсилий баян қилип чиққан.

Мақалидә бил пристәпниң гуваһлиқиға қошуп, америка әдлийә идариси дөләт бихәтәрлики бөлүминиң башлиқи җон дамериниң бу мәсилә һәққидики көз-қаришиму оттуриға қоюлған болуп, у хитайниң америкидин сода яки һәрбий мәхпийәтликләрни оғрилашқа урунушини нуқтилиқ тилға елип өткән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт