Amérika siyasiyonliri xitay “Edliye penliri instituti” ning émbargo tizimlikidin chiqiriwétilgenlikini tenqid qildi

Washin'gtondin muxbirimiz erkin teyyarlidi
2023.11.21

Amérika prézidénti jow baydén bilen xitay re'isi shi jinping san-fransiskoda körüshüp, herbiy alaqini eslige keltürüshni öz ichige alghan bezi mesililerde pikir birliki hasil qilghan'gha bir heptidek bolghan bolsimu, biraq bu uchrishish amérikada dawamliq munazire qilinmaqta. Amérika awam palatasining jumhuriyetchi ezasi, awam palatasi tashqi ishlar komitétining re'isi maykil mikka'ul (Michael McCaul) baydin hökümitining uchrishishtin kéyinla xitay döletlik “Edliye penliri instituti” ni amérikaning émbargo tizimlikidin chiqiriwetkenlikini tenqid qilghan. Maykil mikka'ulning qarishiche, baydin hökümiti xitay bilen sün'iy epyün dorisi - fentanil (fentanyl) gha qarshi hemkarlishish bedilige xitay döletlik “Edliye penliri instituti” ni émbargo tizimlikidin chiqiriwetken bolsimu, lékin bu hemkarliqning ishqa yarishi gumanliq iken.

Amérika hökümiti ilgiri xitay j x ministirliqi tarmiqidiki döletlik “Edliye penliri instituti” gha uning Uyghurlarni basturushta rol oynighanliqi seweblik émbargo yürgüzgen. Lékin amérika taratqulirining xewerliride bu organning 16-noyabirdin bashlap émbargo tizimlikidin chiqiriwétilgenliki ilgiri sürülgen idi. Re'is maykil mikka'ul 20-noyabir amérika “Fox Xewerliri” téléwiziye qanilining ziyaritini qobul qilghanda mundaq dégen: “Fentanil mesilisidimu hemkarlashmaqchi boldi. Elwette men buninggha gumani qaraymen. Baydén hökümiti hemkarliq bedilige xitayning ‛edliye penliri instituti‚ni émbargo tizimlikidin chiqiriwetti. Halbuki, bu orun Uyghur musulmanlirining bi'ologiyelik ewrishke uchurlirini toplighan, shundaqla ularni mejburi emgek lagérlirigha yötkeshke qatnashqan.”

Jow baydin bilen shi jinpingning uchrishishi we ular hasil qilghan hemkarliq türi jumhuriyetchilerning tenqidige uchrighan bolsimu, lékin prézidént baydin körüshüshning “Ijabiy hem ünümlük” bolghanliqini bildürmekte. Prézidént baydinning éytishiche, ikki rehber herbiy alaqini eslige keltürüsh we fentanilgha qarshi hemkarlishishtin sirt, sün'iy eqil téxnikisining tehditi heqqidimu pikir birliki hasil qilghan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.