Fransiye jenubiy déngizgha urush paraxoti ewetip, xitaygha riqabet élan qildi

Muxbirimiz erkin
2018.06.08

Fransiye yéqinda jenubiy déngizgha urush paraxoti ewetip, xitayning bu rayondiki igilik hoquq telipige xiris qilghan.

“Wol stérét zhornal géziti” de peyshenbe küni élan qilin'ghan bir maqalide, bir fransiye urush paraxotining jenubiy déngizgha kirip, xitay nensha taqim aralliri, dep ataydighan sipratil taqim arallirining yénidin ötkenliki we bu rayondiki xitay herbiy paraxotliri bilen tirkeshkenlikini bildürdi.

“Wol stérét zhornal géziti” diki maqalida bayan qilinishiche, xitay herbiy paraxotliri fransiye urush paraxotidin “Nensha aralliri xitayning igilik hoquqidiki zémin, silerning meqsitinglar néme?” dep sorighan.

Fransiye urush paraxoti bolsa özlirining xelq'ara déngizda qatnawatqanliqini bildürgen. Bu heqtiki analizlarda amérikining jenubiy déngizda xelq'ara erkin déngiz qatnishini qoghdash chaqiriqigha yawropa döletlirining ishtirak qilishqa bashlighanliqi ilgiri sürüldi.

Yéqinda amérika dölet mudapi'e ministiri jim mattis, shi jinpingning wedisige xilapliq qilip, jenubiy déngizni herbiyleshtürgenlikini tenqid qilghan. U sin'gaporda ötküzülgen asiya bixeterlik yighinida “Xitayning sipratil taqim arallirini herbiyleshtürüshi prézidént shi jinpingning 2015‏-yili aq sarayning baghchisida bergen wedisige xilap” dégen.

Mezkur yighinda fransiye dölet mudapi'e ministiri florans parléy fransiyening en'giliye we gérmaniye bilen birge igilik hoquqi ixtilaptiki bu rayonda déngiz meshghulatini dawamlashturidighanliqini bildürgen.

“Wol stérét zhornal géziti” ning maqalisida qeyt qilinishiche, fransiye urush paraxoti sipratil tarim arallirining mischif, rubi réf, fériy kros aralliridin ötkende xitay urush paraxotliri uning arqisidin egiship mangghan.

Bu weqe yüz bergende en'giliye, gérmaniye qatarliq yawropa döletlirining bir terepsiz közetküchiler ömikini élip mangghan bir tik uchar fransiye urush paraxoti bilen birge mangghan idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.