Франсийә җәнубий деңизға уруш парахоти әвәтип, хитайға риқабәт елан қилди

Мухбиримиз әркин
2018-06-08
Елхәт
Пикир
Share
Принт

Франсийә йеқинда җәнубий деңизға уруш парахоти әвәтип, хитайниң бу райондики игилик һоқуқ тәлипигә хирис қилған.

«Вол стерет жорнал гезити» дә пәйшәнбә күни елан қилинған бир мақалидә, бир франсийә уруш парахотиниң җәнубий деңизға кирип, хитай нәнша тақим араллири, дәп атайдиған сипратил тақим араллириниң йенидин өткәнлики вә бу райондики хитай һәрбий парахотлири билән тиркәшкәнликини билдүрди.

«Вол стерет жорнал гезити» дики мақалида баян қилинишичә, хитай һәрбий парахотлири франсийә уруш парахотидин «нәнша араллири хитайниң игилик һоқуқидики земин, силәрниң мәқситиңлар немә?» дәп сориған.

Франсийә уруш парахоти болса өзлириниң хәлқара деңизда қатнаватқанлиқини билдүргән. Бу һәқтики анализларда америкиниң җәнубий деңизда хәлқара әркин деңиз қатнишини қоғдаш чақириқиға явропа дөләтлириниң иштирак қилишқа башлиғанлиқи илгири сүрүлди.

Йеқинда америка дөләт мудапиә министири җим маттис, ши җинпиңниң вәдисигә хилаплиқ қилип, җәнубий деңизни һәрбийләштүргәнликини тәнқид қилған. У сингапорда өткүзүлгән асия бихәтәрлик йиғинида «хитайниң сипратил тақим араллирини һәрбийләштүрүши президент ши җинпиңниң 2015‏-йили ақ сарайниң бағчисида бәргән вәдисигә хилап» дегән.

Мәзкур йиғинда франсийә дөләт мудапиә министири флоранс парлей франсийәниң әнгилийә вә германийә билән биргә игилик һоқуқи ихтилаптики бу районда деңиз мәшғулатини давамлаштуридиғанлиқини билдүргән.

«Вол стерет жорнал гезити» ниң мақалисида қәйт қилинишичә, франсийә уруш парахоти сипратил тарим араллириниң мисчиф, руби реф, ферий крос араллиридин өткәндә хитай уруш парахотлири униң арқисидин әгишип маңған.

Бу вәқә йүз бәргәндә әнгилийә, германийә қатарлиқ явропа дөләтлириниң бир тәрәпсиз көзәткүчиләр өмикини елип маңған бир тик учар франсийә уруш парахоти билән биргә маңған иди.

Пикирләр (0)
Share
Толуқ бәт