Хитай сақчилири франсийәдики уйғурларниң шәхсий учурлирини тәләп қилған

Мухбиримиз қутлан
2018-03-03
Елхәт
Пикир
Share
Принт

Хитай һөкүмитиниң пүтүн дуня миқясидики уйғурларниң шәхсий учурлирини топлаш, уларни түрлүк усуллар билән контрол қилишқа урунуш яки муһаҗирәттики уйғурларни хитай қорқунчи иликидә яшашқа мәҗбурлаш оператсийәси хәлқара җамаәтчиликниң диққитини қозғимақта.

Америкада чиқидиған «ташқи сиясәт» журнилиниң җүмә күнидики хәвиригә қариғанда, хитай сақчилири франсийәдә оқуватқан яки олтурақлашқан уйғурларға тәһдит селип, уларниң шәхсий учурлирини топлашқа киришкән.

Хәвәрдә дейилишичә, хитай сақчилири франсийәдики уйғурларниң өй адреси, хизмәт орни яки оқуватқан мәктипиниң конкрет учурлири, хитайдин алған кимлики билән франсийәдики кимликиниң фотокопийәси, франсийәдә той қилған болса җорисиниң кимлики, һәтта фирансийә паспорти вә той хети қатарлиқларниң көпәйтилгән нусхилирини дәрһал әвәтип беришни тәләп қилған.

Бу әһвал өткән йилиниң кейинки йеримидин башлап түркийә, мисир вә әрәб әллиридики уйғурларниң бешиғиму кәлгән. Кейинчә хитай сақчилириниң бу йолсиз тәлипи явропа әллири, америка, канада, австралийә вә японийә қатарлиқ әлләрдә яшаватқан уйғурларғичә кеңәйгән.

«Ташқи сиясәт» журнилидики хәвәрдин мәлум болушичә, хитай сақчилири франсийәдики уйғурларға биваситә телефон қилиш, вечат қатарлиқ хитайдики учур алақә әплири арқилиқ учур йоллаш, һәтта уларниң аилисидики ата-ана вә уруқ-туғқанлирини қисмаққа елиш қатарлиқ васитиләрни қоллинип, уларниң шәхсий учурлирини елишқа урунған.

Хитайниң алдинқи йиллардин буян уйғур дияридики йәрлик хәлқләрниң қан әвришкисини топлиши, д н а амбири қуруши, һәр бир шәхс үчүн шәхсий саламәтлик архипи турғузуши, уйғурларниң сиясий җәһәттин ишәнчлик яки ишәнчсизликини бекитидиған җәдвәл чиқириши вә башқа чекидин ашқан бесим сиясәтлири хәлқара кишилик һоқуқ органлириниң диққитини қозғиған иди.

Көзәткүчиләр, нөвәттә хитайниң чәтәлләрдики уйғурларниң шәхсий учурлирини топлашқа өткәнлики уларниң уйғурларға қарита йәр шари көләмлик контроллуқ системиси шәкилләндүрүшкә урунуватқанлиқиниң бир бәлгиси, дәп қаримақта.

Пикирләр (0)
Share
Толуқ бәт