G7 Дөләтлири кичик көләмлик хитай банкилирини русийәгә ярдәм қилмаслиқ һәққидә агаһландурмақчи

Вашингтондин мухбиримиз әркин тәйярлиди
2024.06.10

“санаәтләшкән йәттә дөләт гуруһи” (G7) ниң 13-июн күни италийәдә өткүзүлидиған башлиқлар йиғинида кичик көләмлик хитай банкилири русийәниң җазадин қечишиға ярдәм қилмаслиқ һәққидә агаһландурулидиғанлиқи мәлум болмақта. Хәвәрләрдә, хитай-русийә сода мунасивитиниң украина урушиға қандақ ярдәмдә болуватқанлиқи йиғинниң мәркизи темилириниң бири болидиғанлиқи қәйт қилинмақта. Ройтерс агентлиқиниң билдүрүшичә, “санаәтләшкән йәттә дөләт башлиқлири” бу қетимлиқ йиғинда кичик типлиқ хитай банкилирини қаттиқ агаһландурмақчи, шуниңдәк улардин русийәниң җазадин қечишиға ярдәм қилишни тохтитишни тәләп қилмақчи икән.

Һалбуки, вәзийәттин хәвәрдар затлар “санаәтләшкән йәттә дөләт башлиқлири” хитай банкилирини қаттиқ агаһландурсиму, бирақ бу қетимлиқ йиғинда хитай банкилириға қарши конкрет җазалаш тәдбирлирини елан қилмайдиғанлиқини ейтқан. 2024-Йили 4-айда америка ташқи ишлар министири антони билинкен хитайни зиярәт қилип “әгәр хитай һөкүмити русийә уруш машинисиға ярдәм қилишни тохтитишта һәрикәткә өтмисә, өзлириниң һәрикәткә өтүдиғанлиқи” ни агаһландурған иди. Хитай таможна санлиқ мәлуматлирида, 2023-йили хитай-русийә омуми сода миқдариниң 240 милярд долларға йетип, 26.3 Пирсәнт артқанлиқи, хитайниң експорти 46.9 Пирсәнт көпәйгәнлики қәйт қилинмақта. Йеқинқи хәвәрләрдә, хитайниң уйғур дияридин оттура асия җумһурийәтлири арқилиқму русийәгә мал експорт қиливатқанлиқи, шуңа уйғур дияриниң експорт миқдари 2022-йилдин буян шиддәтлик артқанлиқини илгири сүргән.

Хәвәрләрдин мәлум болушичә, нөвәттә хитайниң чоң банкилири русийә билән болған пул оборотиға чәклимә қойған болсиму, әмма хитай ширкәтлири чегра еғизлиридики кичик типлиқ банкилар арқилиқ давамлиқ пул обороти қилмақта икән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.