Германийә кишилик һоқуқ тәшкилати уйғур илидики сақчиларниң зораванлиқини тәнқид қилди

Мухбиримиз әркин
2015.02.25


Хәтәр астидики хәлқләр җәмийити намлиқ германийә кишилик һоқуқ тәшкилати баянат елан қилип, уйғур илидики җиддий вәзийәтни сақчиларниң зораванлиқи кәлтүрүп чиқириватқанлиқини агаһландурди. Мәзкур орган 24 - феврал елан қилған баянатида, уйғур илида йеқинқи 10 күн ичидә 25 киши сақчилар билән уйғур оттурисидики тоқунушта өлгәнликини тәкитләп, “бу, шинҗаң яки шәрқий түркистан районида вәзийәт йәнә бир қетим җиддийлишип кәткәнликиниң рошән ипадиси” дегән. Баянатта көрситишичә, аилә әзалири сиясий сәвәблик түрмидә ятқан, сақал қойған яки әнәнивий ислами кийим кийгәнлики үчүн даириләрниң нәзиридә он миңлиған уйғур гуманлиқ кишиләргә айлинип қалған.

Хәтәр астидики хәлқләр җәмийитиниң асия ишлири дриктори улрих делиус мундақ дәйду: “уйғурларни қорқутушни мәқсәт қилип елип бериливатқан өй ахтуруш, сорақ қилиш, халиғанчә тутқун қилишлар вәһимини күчәйтип, зораванлиқниң тәкрарлинишиға түрткә боливатиду” дигән.

Хәтәр астидики хәлқләр тәшкилати мәзкур баянатини 17 - феврал бай наһийәсидә йүз бәргән “яқаериқ вәқәси”, 16 - феврал қарақаш наһийәсидә йүз бәргән “бәшқудуқлар вәқәси” вә гума наһийәсидә йүз бәргән 13 - феврал вәқәлиригә қарита елан қилған.

Байдики “яқаериқ вәқәси”дә 17 киши өлгән. Вәқәдә сақчилар 9 нәпәр пидаийни етип өлтүргән. Пидаийлар 4 сақчини өлтүргән, 4 пуқра сақчиларниң оқида өлгән иди.

Хәтәр астидики хәлқләр җәмийити хитай сақчилирини рәһимсизлик билән тәнқидләп, “зиянкәшликкә учуриғучиларниң тез көпийишини сақчиларниң рәһимсизләрчә һәрикити кәлтүрүп чиқириватқанлиқи бир пакит” дегән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.