Dunya Uyghur qurultiyi xitayning gérmaniyide qurghan shinjang oqughuchilar birleshmisige inkas qayturdi

Dunya Uyghur qurultiyi bash katipi dolqun eysa 21-mart küni radiyomiz arqiliq bayanat bérip, dunya Uyghur qurultiyining merkizi jaylashqan gérmaniyide, xitay elchxanisi teripidin qurulghan atalmish “Shinjang oqughuchilar uyushmisi” we xitayning gérmaniyidiki elchixanisi teripidin ötküzülgen “Shinjangliq oqughuchilargha oqush mukapati tarqitish” murasimining meqsiti heqqide toxtaldi.

Dolqun eysa ependi, xitay hökümitining yéqinqi yillardin buyan oqush, xizmet we bashqa sewebler bilen chet'ellerge, bolupmu gherb ellirige chiqqan Uyghurlargha qaratqan teshwiqatni kücheytip, ularning gherb démokratik döletliridiki Uyghur teshkilatliri we Uyghur jama'iti bilen bilen bolghan alaqisini chekleshke urunuwatqanliqini pash qildi. U, xitayning atalmish “Oqush mukapati”, “ Shinjanggha sayahet” qatarliq iqtisadiy jehettin menpe'et bérish usullirini qollinip, gherb döletliride oquwatqan oqughuchilarni we démokratik döletlerning puqraliqigha ötüp bolghan Uyghurlarni xitay hökümitining teshwiqatini qilishqa, hetta xitay hökümitige jasusluq qilishqa qistawatqanliqini bildürdi.

Xitay xewerler torining 21-mart seyshenbe künidiki xewiridin melum bolushiche, xitayning gérmaniyining bérlin shehiridiki bash elchixanisi, 20-mart küni 2017-yilliq “Shinjangliq oqughuchilargha oqush mukapati tarqitish murasimi” ötküzüsh bilen birlikte, gérmaniyide öz xirajiti bilen oquwatqan 150 tin artuq “Shinjangliq oqughuchilar”asasida “Shinjangliq oqughuchilar uyushmisi” qurulghanliqini jakarlighan. Xewerde yene, ularning 2011-yildin buyan 68 oqughuchigha oqush mukapati bergenliki we elchixanida “Jelpkar shinjang” namidiki noruzni tebriklesh pa'aliyiti ötküzgenliki tilgha élin'ghan.