Д у қ германийәдә уйғур панаһланғучилар мәсилиси һәққидә хәлқаралиқ йиғин ачиду

Мухбиримиз әзиз
2016-04-20
Share

Дуня уйғур қурултийи ахбарат мәркизидин мәлум болушичә, д у қ ниң биваситә йетәкчиликидә мушу айниң 25- вә 26-күнлири германийәниң берлин шәһиридә "шәрқий түркистандин қечип чиқиватқан уйғур панаһланғучиларниң мүшкүлатлири" нуқтилиқ муһакимә қилинидиған хәлқаралиқ йиғин ечилиду.

"уйғур панаһланғучиларниң һәқ вә һоқуқлири: өтмүштики вә һазирқи хирислар" намидики мәзкур хәлқаралиқ йиғин америка демократийини илгири сүрүш фондиниң иқтисадий ярдими билән ечилидиған болуп, д у қ ниң мәзкур йиғиниға "вакаләтсиз дөләтләр вә милләтләр тәшкилати" вә "хәтәр астидики милләтләр җәмийити" му биллә саһибханилиқ қилиду.

Мәзкур икки күнлүк йиғинда дуняниң һәрқайси җайлиридин кәлгән мутәхәссисләр, паалийәтчиләр, шаһитлар вә һәрсаһә вәкиллири бирликтә уйғур панаһланғучиларниң һазирқи мүшкүлатлири вә униң һәл қилиш чарилирини музакирә қилиду. Униңдин башқа йәнә, йиғин җәрянида д у қ ниң алақидар рәһбәрлири йиғинға қатнашқан башқа тәшкилат вә органлар билән сөһбәтләрдә болиду.

Йиғинда музакирә қилинидиған йәнә бир муһим тема, истанбул вә қәйсәридики уйғур җамаитини нуқтилиқ тәкшүрүш асасида тәйярланған доклатқа қарап чиқиштур. Бу уйғурлар 2012-йилидин 2015-йилиғичә болған арилиқта хитайдин қечип чиққан болуп, мәзкур доклат арқилиқ уйғурлар дияриниң һазирқи әһвали һәмдә зулум дәстидин қечишқа мәҗбур болғанларниң мүшкүлатлири йеңиваштин қарап чиқилиду.

Мәлум болушичә, хитайдики зулум түпәйлидин чәтәлгә қечип чиқишқа мәҗбур болған уйғур мусапирларниң хитайға қошна болған тайланд, камбоджа вә оттура асия әллиригә қечип чиққандин кейинки бәхтсиз қисмәтлири һәмдә улар дуч келиватқан мүшкүлатлар бу мәсилиләрниң бу қетимқи йиғинда муһим нуқта сүпитидә музакирә қилинишини бәлгилигән амиллар икән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт