D u q gérmaniyede Uyghur panahlan'ghuchilar mesilisi heqqide xelq'araliq yighin achidu

Muxbirimiz eziz
2016-04-20
Share

Dunya Uyghur qurultiyi axbarat merkizidin melum bolushiche, d u q ning biwasite yétekchilikide mushu ayning 25- we 26-künliri gérmaniyening bérlin shehiride "Sherqiy türkistandin qéchip chiqiwatqan Uyghur panahlan'ghuchilarning müshkülatliri" nuqtiliq muhakime qilinidighan xelq'araliq yighin échilidu.

"Uyghur panahlan'ghuchilarning heq we hoquqliri: ötmüshtiki we hazirqi xirislar" namidiki mezkur xelq'araliq yighin amérika démokratiyini ilgiri sürüsh fondining iqtisadiy yardimi bilen échilidighan bolup, d u q ning mezkur yighinigha "Wakaletsiz döletler we milletler teshkilati" we "Xeter astidiki milletler jem'iyiti" mu bille sahibxaniliq qilidu.

Mezkur ikki künlük yighinda dunyaning herqaysi jayliridin kelgen mutexessisler, pa'aliyetchiler, shahitlar we hersahe wekilliri birlikte Uyghur panahlan'ghuchilarning hazirqi müshkülatliri we uning hel qilish charilirini muzakire qilidu. Uningdin bashqa yene, yighin jeryanida d u q ning alaqidar rehberliri yighin'gha qatnashqan bashqa teshkilat we organlar bilen söhbetlerde bolidu.

Yighinda muzakire qilinidighan yene bir muhim téma, istanbul we qeyseridiki Uyghur jama'itini nuqtiliq tekshürüsh asasida teyyarlan'ghan doklatqa qarap chiqishtur. Bu Uyghurlar 2012-yilidin 2015-yilighiche bolghan ariliqta xitaydin qéchip chiqqan bolup, mezkur doklat arqiliq Uyghurlar diyarining hazirqi ehwali hemde zulum destidin qéchishqa mejbur bolghanlarning müshkülatliri yéngiwashtin qarap chiqilidu.

Melum bolushiche, xitaydiki zulum tüpeylidin chet'elge qéchip chiqishqa mejbur bolghan Uyghur musapirlarning xitaygha qoshna bolghan tayland, kambodzha we ottura asiya ellirige qéchip chiqqandin kéyinki bextsiz qismetliri hemde ular duch kéliwatqan müshkülatlar bu mesililerning bu qétimqi yighinda muhim nuqta süpitide muzakire qilinishini belgiligen amillar iken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet