“германийә авази” ишлигән һөҗҗәтлик филимда уйғурларниң мәхпий шәкилдә ирқий қирғинчилиққа учраватқанлиқи көрситилгән

Вашингтондин мухбиримиз җәвлан тәйярлиди
2023.08.09

Германийәдики даңлиқ таратқулардин болған “германийә авази” йеқинда “мәҗбурий әмгәк вә тутқун қилиш” намлиқ һөҗҗәтлик филим елан қилған. Филимда уйғурлар дуч кәлгән вә һазирму давамлишиватқан ирқий қирғинчилиқниң арқа көрүнүши һәмдә бу қирғинчилиқниң дуняға мәхпий вә юқири техника ярдими билән елип бериливатқанлиқи көрситилгән.

Филимда мундақ соал қоюлиду: “бир милйондин артуқ уйғур халиғанчә тутқун қилинди, қийин-қистаққа елинди, мәҗбурий әмгәккә селинди, аяллири туғмас қилинди. Лагерларниң қоршав тамлири арқисида йүз бериватқан бу ишлар бир мәйдан ‛тинч шәкиллик‚ ирқий қирғинчилиқму? шинҗаң һөкүмити һазир қандақ пиланни иҗра қиливатиду? ”

Филимда, юқириқи қәбиһ җинайәтләргә яндаш һалда лагер мәһбуслириға вә аилисидин айриветилгән балиларға елип бериливатқан меңә ююш һәрикити, тил вә мәдәнийәт бузғунчилиқи қатарлиқлар мисалға елип, хитайниң һәқиқәтән уйғурларға “аста вә тинч шәкиллик” ирқий қирғинчилиқ елип бериватқанлиқи көрситилгән.

Бу ирқий қирғинчилиқниң арқа көрүнүши сүпитидә берилгән баянларда, 2014-йили ши җинпиң уйғур районини көздин кәчүргәндә хитай әмәлдарлириға “бу районға қаттиқ сиясәт қоллиниш, қилчә рәһим қилмаслиқ” ни буйруғанлиқи, униң бу йолйоруқи билән 2-дуня урушидин кейинки әң еғир бастуруш вә ирқий қирғинчилиқниң йүз бәргәнлики чүшәндүрүлгән. Хитайниң уйғурларға бундақ қәбиһ усулда зиянкәшлик қилиштики асаслиқ баһанисиниң ‛террорлуқ, бөлгүнчилик, әсәбийлик‚ кә зәрбә бериш икәнлики, хәлқарани мушу усулда алдап кәлгәнлики вә америка қатарлиқ ғәрб әллириниң қарши турушиға қаримай, бу җинайитини давамлаштуруп келиватқанлиқи, шуңа бу мәсилиниң хитайдинму һалқип, пүткүл дуняниң әркинлики вә демократийәсини қоғдашқа мунасивәтлик зор мәсилә болуп қалғанлиқи көрситилгән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.