Германийә ташқий ишлар министери хитайни кишилик һоқуқ мәсилисидики “негизлиқ пәрқләр” тоғрисида агаһландурған

Мухбиримиз әркин
2022.01.21
Share on WhatsApp
Share on WhatsApp

Германийә ташқий ишлар министери анналена барбок 20-январ күни хитай ташқий ишлар министири ваң йи билән телефонда сөзләшкәндә, хитайни кишилик һоқуқ мәсилисидики “негизлиқ пәрқләр” тоғрисида агаһландурған. Таратқулар барбокниң сөзини берлинниң хитайға қарита сабиқ баш министер меркел дәвригә қариғанда техиму тәнқидий позитсийә тутуши мумкинликиниң сигнали, дәп қариған.

“яху-малийә” ториниң хәвәр қилишичә, барбокниң ‍ишханиси 20-январ елан қилған баянатида, хитай билән болған йеқин һәмкарлиқта келимат өзгириши, муһит сиясити, хәлқара қанун вә қаидә-түзүм асасидики хәлқара тәртипкә һөрмәт қилиш қатарлиқ җәһәтләрдиму һәмкарлиқ елип беришниң муһимлиқи тәкитлинип: “шу сәвәбтин сөһбәттә кишилик һоқуқни өз ‍ичигә алған пикир җәһәттики мәвҗут негизлик пәрқләрму оттуриға қоюлди,” дейилгән. Бирақ баяннатта бу “негизлик пәрқләр” ниң конкерт немә икәнлики, буниң уйғурлар мәсилисиниму өз ичигә алидиған-алмайдиғанлиқи тилға елинмиған.

Германийә-хитай ташқий ишлар министирлирниң телефон сөһбити, франсийә парламенти мутләқ көп аваз билән қарар мақуллап, хитайни уйғурларға ирқий қирғинчилиқ қилиш билән әйиблигән, шундақла бейҗиң германийәниң ангела меркел дәвридики хитай билән йеқинлишиш сияситиниң өзгиришидин әндишә қиливатқан бир вақитта өткүзүлгән. Германийә илгири хитай билән йеқинлишип, уйғурларниң ирқий қирғинчилиққа учришиға аваз чиқармаслиқ билән әйиблинип кәлгән. “яху-малийәси” ниң хәвиридә ейтилишичә, сөһбәттә ваң йи германийәни “яңратқу дипломатийәси” дин йирақ турушқа үндигән, шундақла германийә ширкәтлириниң хитайға мәбләғ селишни кеңәйтишини қарши алидиғанлиқи, хитайниң ичкий ишлириға арлашмаслиқини үмид қилидиғанлиқини ейтқан.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.