Gérmaniye tashqiy ishlar ministéri xitayni kishilik hoquq mesilisidiki “Négizliq perqler” toghrisida agahlandurghan

Muxbirimiz erkin
2022.01.21
Share on WhatsApp
Share on WhatsApp

Gérmaniye tashqiy ishlar ministéri annaléna barbok 20-yanwar küni xitay tashqiy ishlar ministiri wang yi bilen téléfonda sözleshkende, xitayni kishilik hoquq mesilisidiki “Négizliq perqler” toghrisida agahlandurghan. Taratqular barbokning sözini bérlinning xitaygha qarita sabiq bash ministér mérkél dewrige qarighanda téximu tenqidiy pozitsiye tutushi mumkinlikining signali, dep qarighan.

“Yaxu-maliye” torining xewer qilishiche, barbokning ‍ishxanisi 20-yanwar élan qilghan bayanatida, xitay bilen bolghan yéqin hemkarliqta kélimat özgirishi, muhit siyasiti, xelq'ara qanun we qa'ide-tüzüm asasidiki xelq'ara tertipke hörmet qilish qatarliq jehetlerdimu hemkarliq élip bérishning muhimliqi tekitlinip: “Shu sewebtin söhbette kishilik hoquqni öz ‍ichige alghan pikir jehettiki mewjut négizlik perqlermu otturigha qoyuldi,” déyilgen. Biraq bayannatta bu “Négizlik perqler” ning konkért néme ikenliki, buning Uyghurlar mesilisinimu öz ichige alidighan-almaydighanliqi tilgha élinmighan.

Gérmaniye-xitay tashqiy ishlar ministirlirning téléfon söhbiti, fransiye parlaménti mutleq köp awaz bilen qarar maqullap, xitayni Uyghurlargha irqiy qirghinchiliq qilish bilen eyibligen, shundaqla béyjing gérmaniyening an'géla mérkél dewridiki xitay bilen yéqinlishish siyasitining özgirishidin endishe qiliwatqan bir waqitta ötküzülgen. Gérmaniye ilgiri xitay bilen yéqinliship, Uyghurlarning irqiy qirghinchiliqqa uchrishigha awaz chiqarmasliq bilen eyiblinip kelgen. “Yaxu-maliyesi” ning xewiride éytilishiche, söhbette wang yi gérmaniyeni “Yangratqu diplomatiyesi” din yiraq turushqa ündigen, shundaqla gérmaniye shirketlirining xitaygha meblegh sélishni kéngeytishini qarshi alidighanliqi, xitayning ichkiy ishlirigha arlashmasliqini ümid qilidighanliqini éytqan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.