Хитай германийәни кишилик һоқуқ мәсилилиридин йирақ турушқа чақирған

Мухбиримиз ирадә
2021-04-29
Share

Америкадики "политко" гезитиниң хәвәр қилишичә, хитай баш министири ли кечяң 28-април күнидики сөзидә германийә баш министири ангела меркелни икки дөләт арисидики сода алақисини күчәйтишкә, әмма кишилик һоқуқ вә хоңкоңниң сиясий вәзийити қатарлиқ "ички ишлар" дин йирақ турушқа чақирған.

Ли кечяң "6-нөвәтлик германийә-хитай һөкүмәт музакириси" йиғинида "хитай билән германийәниң бәзи мәсилиләрдә пикир охшимаслиқи бир пакит, әмма мениң қаришимчә, икки тәрәп бир-бириниң ядролуқ мәнпәәти вә муһим көңүл бөлүдиған мәсилилиригә һөрмәт қилсила, биз баравәр муамилә қилиш вә бир-биримизниң ичкий ишлириға арилашмаслиқ асасида алақә қилсақла. . . Пәрқни азайтип, һәмкарлиққа әһмийәт берәләймиз," дейиш арқилиқ германийәни иқтисадий мәнпәәтни алдинқи орунға қоюшқа чақирған.

Ли кечяңниң бу сөзлири дәл явропа иттипақи уйғур қирғинчилиқи сәвәбидин хитай әмәлдарлириға җаза тәдбири елан қилған вә германийә парламентида 5-айниң 17-күни "уйғурларға қаритилған кишилик һоқуқ дәпсәндичилики" тоғрисида очуқ испат аңлаш йиғини ечилидиған мәзгилгә тоғра кәлгән.

Бирақ ангела меркил сөһбәт йиғинида қилған сөзидә ли кечяңниң әксичә, сода һәм кишилик һоқуқ музакирилириниң һәр иккилисиниң муһимлиқини тәкитлигән.

У йәнә хәлқара әмгәк тәшкилатиниң мәҗбурий әмгәккә алақидар принсиплириға әмәл қилишниңму муһимлиқини оттуриға қойған. Гәрчә у уйғурларниң мәҗбурий әмгәккә селинишини бивастә тилға алимиған болсиму, әмма "германийә вә хитайдики барлиқ кишиләр үчүн мувапиқ хизмәт шараити интайин муһим," дегән.

Баш министир меркил кишилик һоқуқни техиму кәң даиридә тилға елип, "бу йәрдики пикир охшимаслиқлири, болупму кишилик һоқуқ мәсилилири вә хоңкоңниң вәзийитини ойлиғинимизда оттуриға чиқиду. Биз германийә-хитай кишилик һоқуқ диялогиниң әслигә келишини арзу қилимиз," дегән.

Германийә һөкүмәт баянатчиси кеңәштин кейинки баянатида "икки рәһбәр җәмийәт тәрәққияти вә кишилик һоқуқ мәсилиси үстидә сөһбәтләшти," дегән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт