Gérmaniye kishilik hoquq teshkilati bash ministir mérkélni xongkong we lagérlar mesiliside xitaygha bésim ishlitishke chaqirdi

Muxbirimiz erkin
2019-09-02
Élxet
Pikir
Share
Print

"Tehdit astidiki xelqler jem'iyiti2 "‏-Séntebir küni bayanat élan qilip, gérmaniye bash ministiri an'géla mérkélni 6‏-séntebir bashlinidighan xitay ziyaritide xitaygha xongkong weziyiti we Uyghur rayonidiki lagérlar mesiliside bésim ishlitishke chaqirdi.

Xitay taratqulirining ashkarilishiche, an'géla mérkél 6-séntebir we 7‏-séntebir künliride béyjingni ziyaret qilip, xitay bash ministiri li kéchyang bilen soda söhbiti élip baridiken.

"Tehdit astidiki xelqler jem'iyiti" bayanatida gérmaniyening kishilik hoquqni qoghdash mes'uliyitide ching turushi kérekliki tekitlen'gen. Bayanatta mezkur teshkilatning irqiy qirghinchiliqning aldini élish ishlirigha mes'ul mutexessisi xano shédlér xongkong weziyitining muqimsizliqqa pétip qalghanliqi, gérmaniyening xitay hökümitini zorawanliqning küchiyishining aldini élish xongkong xelqi bilen söhbet ötküzüshke chaqirishini telep qilghan. Xanno shédlér yene Uyghur rayonida bir yérim milyondin artuq Uyghur, qazaq we qirghizlarning "Qayta terbiyelesh lagérliri" gha qamalghanliqi, ularning bu lagérlarda sistémiliq ménge yuyushqa uchrawatqanliqini tekitlep, "Xelq'ara jem'iyet bu lagérlar taqalghuche bu mesilini qayta-qayta otturigha qoyushi kérek" dégen. Xano shédlérning tekitlishiche, "Bash ministir mérkél özining) xitay ( bash ministiri li kéchyang bilen ötküzidighan söhbitide uninggha izchil bésim ishlitishi kérek" iken.

An'géla mérkélning ziyariti xitay hökümiti gérmaniye parlaméntining ikki  neper nopozluq ezasigha wiza bérishni ret qilghan bir waqitta élip bérilidiken. Gérmaniye parlaméntining digital komitéti bilen kishilik hoquq komitéti bu yil 8‏- we 9‏-aylarda xitayning béyjing, shangxey, chongching qatarliq sheherlirini we Uyghur aptonom rayonini ziyaret qilmaqchi bolghan. Lékin xitay hökümiti wekiller ömiki terkibidiki gérmaniye yéshillar partiyesidin bolghan parlamént ezasi margéréta bawzi xanim bilen xristiyan démokratlar partiyesidin bolghan parlamént ezasi maykél brandqa wiza bérishni ret qilghan idi.

Toluq bet