Gérmaniye prézidénti xitay oqughuchilirigha markisizmning buzghunchiliqini esletti

Muxbirimiz erkin
2018-12-07
Élxet
Pikir
Share
Print

Gérmaniye prézidénti frank waltér shtéyinmayér 7‏-dékabir küni xitay sichü'en uniwérsitétining oqughuchilirigha nutuq sözlep, karil marksning büyük gérman peylasofi ikenlikide shek yoqliqi, biraq uning namida zor ziyankeshlikler sadir bolghanliqini agahlandurghan. Prézidént shtéynmayérning 6 künlük xitay ziyariti ötken düshenbe küni bashlan'ghan. U ziyaritini bashlashtin sel burun gérmaniye gottinggén uniwérsitétining bir oqughuchisi uningdin bu ziyaritide Uyghurlarning basturushqa uchrishini otturigha qoyidighan-qoymaydighanliqini sorighan. U ؛ "Elwette puqralarning erkinlik we kishilik hoquqini sözlishidighanliqi" ni bildürgen idi. U sichü'en uniwérsitétidiki nutuqida lagérlarni yaki Uyghurlarning namini tilgha almighan. Emma gérmaniyening az sanliq milletler, ularning diniy yaki öz idiyesi, étiqadini erkin ipadilishi qatarliq mesililerde nahayiti sezgürlükini tekitligen. U marksning büyük bir idé'olog, peylasof, iqtisadshunas, jemiyetshunas ikenlikide shek yoqliqini, biraq uning idiyesi nezeriye bilen cheklinip qalmighanliqini bildürgen. U "Biz gérmanlar marks heqqide sözleshkende sherqiy gérmaniye we yawropada uning namida sadir bolghan zor ziyankeshliklerni tilgha almay ötelmeymiz" dégen. U yene diktatorluq we basturushning nurghun yillar gérmaniye tarixigha tamghisini basqanliqini eskertip, "Mana bu bizning öktichi pikirdikilerge, diniy ibadet qilishqa, idiyesi we étiqadi bilen tinch yashash isteklirige alahide sezgür qarishimizgha hem köngül bölüshimizge türtke boldi" dep körsetken.

Shtéyinmayérning ziyariti xitay 800 mingdin 2‏-3 milyon'ghiche bolghan Uyghur we bashqilarni yighiwélish lagérlirigha qamap, gherb dunyasini tang qaldurghan shundaqla gérmaniye-xitay kishilik hoquq di'alogi lxasada ötküzülgen mezgilde élip bérildi. En'giliye taratqulirining xewer qilishiche, gérmaniye kishilik hoquq emeldari barbél köflér bu qétimqi di'alogda Uyghur rayonidiki lagérlarni ziyaret qilishni telep qilghan. Biraq xitay köflérning telipini ret qilghan.

Toluq bet