Германийә һөкүмитиниң ички доклати: «уйғурлар хитайға қайтурулса из-дерәксиз ғайиб болиду»

Мухбиримиз әркин
2020-02-03
Елхәт
Пикир
Share
Принт

Йеқинда германийә ташқи ишлар министирлиқиниң уйғурлар һәққидики бир мәхпий доклати ашкарилинип, һөкүмәтниң уйғур райондики кишилик һоқуқ дәпсәндичилики илгири сүрүлди.

Мәзкур доклат өткән һәптә «германийә долқунлири» қатарлиқ нопузлуқ германийә таратқулири тәрипидин ашкариланған. Германийә таратқулириниң тәкитлишичә, доклатта 2016‏-йилдин кейин хитайниң уйғурларни нишан қилған бастуруш тәдбирлири вә системилиқ кәмситиш һәрикәтлирини «җиддий рәвиштә күчәйткәнлики, доклатта уйғурларниң хитайға қайтуруп берилсә из-дерәксиз ғайиб болидиғанлиқи» тәкитләнгән икән.

Германийә һөкүмити уйғур райониниң вәзийитидин әндишә қиливатқанлиқини изчил тәкитләп кәлгән болсиму, лекин у райондики йиғивелиш лагерлирини тәнқидләштә еһтиятчан позитсийә тутуп кәлгән иди. Земинис, волкес-ваген қатарлиқ германийә ширкәтлириниң уйғур районидики завутлири изчил мәшғулат қилип кәлгән иди.

Германийә таратқулириниң қәйт қилинишичә, доклатта бир милйондин артуқ уйғурниң 2016‏-йилдин кейин қурулған түрмә вә лагерларда ғайиб болғанлиқи, нурғунлириниң изчил тутуп турулуватқанлиқи, бәзилириниң әмгәк лагерлириға йөткәлгәнлики, қалғанлириниң йәрлик даириләрниң қаттиқ назаритидә өйлиригә қайтурулуп, әркин һәрикәт қилиши чәкләнгәнлики илгири сүрүлгән икән.

Доклатта йәнә тутқунларниң лагерларда қопал муамилигә, җинсий хорлашқа учриғанлиқи вә өлгәнликигә даир доклатлар барлиқи тәкитләнгән. Доклатта мисир, қазақистан, малайшия, пакистан, тайланд қатарлиқ дөләтләрниң уйғурларни хитайға қайтуруп бәргәнлики, қайтуруп берилгән уйғурларниң қәйәрдә икәнлики тоғрисида һечқандақ учур йоқлуқи тәкитлинип, уларниң из-дерәксиз ғайиб болғанлиқи илгири сүрүлгән. Германийә һөкүмити өткән йили көчмәнләр идарисигә буйруқ чүшүрүп, һәр қандақ уйғурни хитайға қайтурмаслиқни тәләп қилған иди.

Пикирләр (0)
Share
Толуқ бәт