Gérmaniye hökümitining ichki doklati: "Uyghurlar xitaygha qayturulsa iz-déreksiz ghayib bolidu"

Muxbirimiz erkin
2020-02-03
Élxet
Pikir
Share
Print

Yéqinda gérmaniye tashqi ishlar ministirliqining Uyghurlar heqqidiki bir mexpiy doklati ashkarilinip, hökümetning Uyghur rayondiki kishilik hoquq depsendichiliki ilgiri sürüldi.

Mezkur doklat ötken hepte "Gérmaniye dolqunliri" qatarliq nopuzluq gérmaniye taratquliri teripidin ashkarilan'ghan. Gérmaniye taratqulirining tekitlishiche, doklatta 2016‏-yildin kéyin xitayning Uyghurlarni nishan qilghan basturush tedbirliri we sistémiliq kemsitish heriketlirini "Jiddiy rewishte kücheytkenliki, doklatta Uyghurlarning xitaygha qayturup bérilse iz-déreksiz ghayib bolidighanliqi" tekitlen'gen iken.

Gérmaniye hökümiti Uyghur rayonining weziyitidin endishe qiliwatqanliqini izchil tekitlep kelgen bolsimu, lékin u rayondiki yighiwélish lagérlirini tenqidleshte éhtiyatchan pozitsiye tutup kelgen idi. Zéminis, wolkés-wagén qatarliq gérmaniye shirketlirining Uyghur rayonidiki zawutliri izchil meshghulat qilip kelgen idi.

Gérmaniye taratqulirining qeyt qilinishiche, doklatta bir milyondin artuq Uyghurning 2016‏-yildin kéyin qurulghan türme we lagérlarda ghayib bolghanliqi, nurghunlirining izchil tutup turuluwatqanliqi, bezilirining emgek lagérlirigha yötkelgenliki, qalghanlirining yerlik da'irilerning qattiq nazaritide öylirige qayturulup, erkin heriket qilishi cheklen'genliki ilgiri sürülgen iken.

Doklatta yene tutqunlarning lagérlarda qopal mu'amilige, jinsiy xorlashqa uchrighanliqi we ölgenlikige da'ir doklatlar barliqi tekitlen'gen. Doklatta misir, qazaqistan, malayshiya, pakistan, tayland qatarliq döletlerning Uyghurlarni xitaygha qayturup bergenliki, qayturup bérilgen Uyghurlarning qeyerde ikenliki toghrisida héchqandaq uchur yoqluqi tekitlinip, ularning iz-déreksiz ghayib bolghanliqi ilgiri sürülgen. Gérmaniye hökümiti ötken yili köchmenler idarisige buyruq chüshürüp, her qandaq Uyghurni xitaygha qayturmasliqni telep qilghan idi.

Toluq bet