Германийә йешиллар партийәси: «германийә һөкүмити уйғур мәсилисидә һәрикәткә өтүши керәк»

Мухбиримиз әркин
2019-02-18
Елхәт
Пикир
Share
Принт

Германийә парламент әзаси вә йешиллар партийәсиниң рәһбири маргаретта бавзе ханим германийә һөкүмитиниң уйғур мәсилисидә дәрһал һәрикәткә өтүп, хитайға ениқ бир сигнал бериши керәкликини билдүргән.

Бу маргаретта бавзе ханимниң тунҗи қетим уйғур мәсилисини тилға елиши әмәс. У өткән йили ноябирда германийә парламентида сөз қилип, хитай һөкүмитини лагерларни тақашқа вә лагерлардики бир милйондәк тутқунни қоюп беришкә чақирған иди.

«Германийә долқунлири» радийосиниң хәвәр қилишичә, маргаретта бавзе «мән германийә һөкүмитиниң кишилик һоқуқни иқтисади мәнпәәттин әвзәл орунға қоюп, хитай билән тәрбийәләш лагерлирини вә мусулманларниң кәң көләмлик тәқиб қилиниш вә бастурулуш мәсилисини сөзлишишини үмид қилимән» дегән.

Маргеретта юқириқи сөзләрни уйғур кишилик һоқуқ кризиси дуняниң әндишисини қозғап, америка башчилиқидики демократик әлләр вә мусулман дөләтләр уйғурларни қоғдашқа чақириливатқан бир мәзгилдә қилған.

«Германийә долқунлири» радийосиниң хәвиридә билдүрүшичә, маргаретта бавзе ханим йәнә германийәниң башқа дөләтләр билән бирлишип, б д т ниң мустәқил тәкшүргүчилириниң шинҗаңда тәкшүрүш елип беришини қолға кәлтүрүш үчүн тиришчанлиқ көрситиши керәкликини тәкитлигән. У «германийә б д т да уйғур райониға тәкшүрүш өмики әвәтиш мәсилисини қоллиши керәк» дегән.

Бәзи кишилик һоқуқ тәшкилатлириниң ашкарилишичә, нөвәттә хитай һөкүмити б д т ниң уйғур райониға тәкшүрүш өмики әвәтип қелишидин әнсирәп, лагерда қамақ җазасиға һөкүм қилинған нурғун тутқунларни ичкири хитай өлкилиридики түрмиләргә йөткимәктә икән. Йеқинда радиомиз уйғур тутқунлириниң хейлоңҗаң, ички моңғул, гәнсу, сичүән қатарлиқ өлкиләрдики түрмиләргә йөткәп келингәнликини дәлиллигән иди.

Пикирләр (0)
Share
Толуқ бәт