Германийә ахбарат агентлиқи хитайниң лагердики уйғурларни узун муддәтлик қамаққа һөкүм қиливатқанлиқини билдүрди

Мухбиримиз әркин
2020-11-02
Share

Германийә ахбарат агентлиқи хәвәр берип, хитайниң лагердики уйғурларни узун муддәтлик қамақ җазасиға һөкүм қиливатқанлиқини билдүргән. Мәзкур агентлиқниң 28-өктәбир елан қилған хәвиридә тәктилинишичә, хитай һөкүмити бурунқи лагерларни бикарлап, униңдики тутқунларни йеңи қурулған лагерларға йөткигән. Йеңи лагерларға йөткәлгән тутқунлар узун муддәтлик қамақ җазалириға һөкүм қилинғаникән. Хәвәрдә, сүний һәмраһ санлиқ мәлуматлири вә аилә әзалириниң бәргән шаһитлиқи лагерларниң орнини узун муддәтлик қамақ җазаси игилләватқанлиқ әндишисини пәйда қилғанлиқи тәкитләнгән.

Хәвәрдә тәкитлинишичә, "шинҗаң шаһитлар архипи" ниң өткән 12 айда кишилик һоқуқ тәшкилатлиридин еришкән 220 дәк тутқунға даир учурида уларниң пәқәт 9 нәпириниң лагерда болуп, қалған 210 нәпири қамақ җазасиға алақидар икән. Хәвәрдә, америкадики роз-хулман технологийә институтиниң дотсенти, уйғуршунас тимути гросниң сөзи нәқил кәлтүрүлгән. Униң тәкитлишчә, хитай һөкүмити алдида лагерларни инкар қилиш, арқидин уни "ятақлиқ мәктәп" дәп җакарлаш, ахирида "курсантлар" ниң оқуш пүттүргәнликини елан қилиш арқилиқ "шинҗаңдики бастурушниң кейинки басқучи учун вақитни қолға кәлтүргән".

Тимоти грос, бу мәзгилдә сахта сот мәһкимилиридә әйиблинип, узун муддәтлик қамақ җазалириға һөкүм қилинған кишиләрниң шиддәтлик көпәйгәнликини билдүргән. Германийә ахбарат агентлиқиниң қәйт қилишичә, 2017-йили уйғур елидә 87 миң адәм 5 йил вә униңдин узун қамақ җазасиға һөкүм қилинғаникән. Хәвәрдә, уйғур елиниң нопуси хитай нопусиниң 2 % гә бармисиму, лекин шу йили хитайда қолға елинған 5 адәмдин бириниң уйғур елидә икәнлики билдүрүлгән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт