Германийә парламентида хитайниң уйғур дияридики бастуруш сиясити тохтитишқа чақирилди

Мухбиримиз сада
2018-11-09
Елхәт
Пикир
Share
Принт

Германийә һөкүмити вә өктичи партийәләр германийә парламентида хитайниң уйғур дияридики уйғурларға қаратқан бастуруш сияситини тохтитишқа чақирди.

Мәзкур чақириқ 8-ноябир, йәни пәйшәнбә күни түркийәдин тарқитилидиған «дуня буллетини», йәни «дуня ахбарати» торида елан қилинған болуп, бу германийә парламентида алаһидә тилға елинған. Чақириқтин мәлум болушичә, германийәдики өктичи йешиллар партийәси хитайниң һәддидин ашқан кишилик һоқуқ дәпсәндичилики, сиясий «меңә ююш» һәрикити вә райондики тәқибләш системилирини қаттиқ әйиблигән.

Чақириқта йешиллар партийәсиниң рәһбәрлиридин маргарит бос ханимниң уйғур дияриниң нөвәттики вәзийити һәққидики сөзлири нәқил елинған. У мундақ дегән: «шинҗаң районида бир милйондин артуқ адәм хитайниң тутуп туруш лагерлириға соланған. У йәрдә намаз оқуш чәкләнгән, мәсчитләр чеқиветилгән. Бу хил сиясәтниң асаслиқ нишани шу йәрдики мусулман миллитиниң мәдәнийити вә диний етиқадини системилиқ йоқитиштур».

Өктичи солчилар партийәсидин стифан либичму милйондин артуқ уйғурниң сәвәбсиз тутқун қилинишини «қобул қилғили болмайдиған иш» дәп тәсвирлигән.

Чақириқта йәнә христиан демократлар бирләшмисиниң рәһбири мишәл брәндму сөз қилған болуп, у германийә һөкүмитиниң хитай әмәлдарлири билән елип бармақчи болған сөһбәтлиридә уйғурларниң кишилик һоқуқ вәзийити мәсилисини давамлиқ оттуриға қойидиғанлиқи һәққидә вәдә бәргән.

Мәлум болушичә, германийә ташқи ишлар министири келәрки һәптә хитайда зиярәттә болидикән. Америка бирләшмә агентлиқиниң бүгүн, йәни 9-ноябир күни елан қилған мунасивәтлик хәвиридә германийә ташқи ишлар министири хейко маас зиярәт давамида уйғурларниң хитай һөкүмити тәрипидин учраватқан зулумини алаһидә тилға алидиғанлиқи баян қилинған. Мәлум болушичә, австралийә ташқи ишлар министири пәйшәнбә күни хитайда елип барған зияритидә лагер мәсилиси һәққидики әндишилирини оттуриға қойған болуп, бу қетимқиси ғәрб дөләтлири рәһбәрлириниң 2-қетим уйғур мәсилисини тилға елиши икән.

6-Ноябир күни әнглийә парламент әзаси әлстәйр кармишәл әнглийә ташқи ишлар министири җеремий хантқа уйғур дияридики «қайта тәрбийәләп өзгәртиш лагерлири» ни әйибләп хәт язған.

Хәттә кармишәл мунуларни билдүргән: «хитайниң уйғур диярида елип бериватқини мәқсәтлик ирқий қирғинчилиқ һәрикити. Милйонлап уйғурниң диний етиқади сәвәблик тутқун қилиниши, етиқади вә мәдәнийитидин ваз кечишкә зорлиниши тоғра әмәс. Әнглийә һөкүмити хитай һөкүмитиниң бу хил кишилик һоқуқ дәпсәндичиликини қаттиқ әйиблиши вә лагерларни тақашқа чақириши керәк.»

Пикирләр (0)
Share
Толуқ бәт