Gérmaniye tashqi ishlar ministiri ma'as, xitayning Uyghur mesiliside ochuq-ashkara bolushini telep qildi

Muxbirimiz erkin
2018-11-12
Élxet
Pikir
Share
Print

Gérmaniye tashqi ishlar ministiri xeyko ma'as, xitay hökümitining Uyghurlargha tutqan mu'amilide ochuq-ashkara bolushini telep qilip, xitayning qayta-terbiyelesh lagérlirini qobul qilmaydighanliqini tekitligen.

Gérmaniye tashqi ishlar ministirining ikki künlük xitay ziyariti düshenbe küni bashlan'ghan. Uning ziyariti bashlinishtin sel burun gérmaniye fédératsiyesi parlaméntining omumi mejlisi Uyghurlarning weziyitini muzakire qilghan.

Shundaqla gérmaniye yene b d t kishilik hoquq kéngishining qerellik yighinida xitayning Uyghur rayonidiki "Qayta‏-terbiyelesh" lagérlirini tenqidlep, lagérlarni taqashni we lagérdikilerni derhal qoyup bérishni telep qilghan idi.

Gérmaniye axbarat agéntliqining xewer qilishiche, xeyko ma'as düshenbe küni xitayning mu'awin bash ministiri li xé bilen körüshken. U körüshüshtin kéyin muxbirlarning "Kishilik hoquq teshkilatliri lagérlarni tekshürüshi kérek, dep qaramsiz?", dégen so'allargha jawab bérip, "Biz qayta-terbiyelesh lagérlirini qobul qilmaymiz" dégen.

Ma'asning bildürüshiche, u yerdiki weziyetni mölcherlesh üchün téximu köp uchurgha éhtiyajliqken. U "Qisqisi, u yerde néme ishlarning yüz bériwatqanliqigha höküm qilishtin burun aldi bilen ochuq-ashkara bir muhit yaritilishi kérek" likini bildürgen. Lékin, kishilik hoquq teshkilatlirining ilgiri sürüshiche, xitay hökümitining bir milyondin artuq Uyghurni lagérlargha qamap, ularni "Diniy étiqadi we medeniyitidin waz kéchishke, milliy örp-adetlirini eyibleshke, shi jipingni medhiyeleshke mejburlawatqanliqigha da'ir ishenchlik deliller bar" iken.

Xeyko ma'as xitay ziyaritini bashlashtin sel burun xitayning gérmaniyede turushluq elchixanisi bayanat élan qilip, gérmaniye parlaménti we hökümitining xitayning Uyghurlargha tutqan mu'amilisini tenqid qilghanliqini eyibligen.

Xitay elchixanisi gérmaniye terepning pozitsiyesini "Xitayning ichki ishlirigha ashkara arilashqanliq, xitayning igilik hoquqigha qopalliq bilen qol tiqqanliq" dégen.

Toluq bet