Kanada géziti chet'eldiki Uyghurlarning ghayib bolghan uruq-tughqanlirigha arxip turghuzuwatqanliqini xewer qildi

Muxbirimiz erkin
2018.11.02

Kanadaning “Yershari we pochta géziti” 1‏-noyabir küni Uyghurlar heqqide xewer élan qilip, chet'eldiki Uyghurlarning xitay lagérlirida ghayib bolghan uruq-tughqan, dost yarenlirige arxip turghuzuwatqanliqini bildürdi.

Mezkur gézitning muxbiri natan wandérklip “Ghayiblarni höjjetleshtürüsh: uruq-tughqan, dost yarenliri ghayib bolghan Uyghurlargha arxip turghuzmaqta” serlewhilik xewiride, Uyghurlarning ghayib bolghan a'ile ezaliri we uruq-tughqanliri heqqide süküt qilishtin waz kechkenlikini bildürgen.

Xewerde, chet'eldiki Uyghurlar ilgiri ashkara sözlise Uyghur rayonida tutqun qilin'ghan a'ile ezalirigha we uruq-tughqanlirigha ziyan-zexmet yétidu, dep süküt qilip kelgen bolsimu, biraq hazir ularning özgergenliki tekitlen'gen.

Xewerde bayan qilinishiche, nöwette dunyaning her qaysi jayliridiki Uyghurlar torda shexsiy guwahliq bérish, Uyghur teshkilatlirigha uchur yollash, “Shinjang qurbanlar uchur ambiri” ni isimlik bilen teminlesh qatarliq pa'aliyetlerge kirishken.

Xewerde, hazirgha qeder toplan'ghan isimlar yenila az bolsimu, biraq buning künséri köpiyiwatqanliqi, lagérlar mesilisi b d t kishilik hoquq kéngishining kéler heptidiki yighinida nuqtiliq mesilige aylinishi mumkinliki bildürülgen.

Xewerde bayan qilinishiche, amérikidiki Uyghurshunas jéni buninning “Shinjang qurbanlar uchuri ambiri” hazirgha qeder 282 kishining ismini toplighan.

Türkiyediki bir pa'aliyetchining 50 neper yazghuchi, sha'ir, ziyaliy we tijaretchining ismini, dunya Uyghur qurultiyi lagérdiki 680 neper kishining, kanadadiki bir teshkilatchi 79 kishining ismini yighqan. Indi'ana shtatidiki roz-holman téxnologiye institutining proféssori timotiy gros “Shinjang qurbanlar uchur ambiri” ni qurghuchi shexslerning biri.

“Yershari we pochta géziti” ning xewiride, timotiy grosning sözi neqil keltürülgen bolup, u uchur ambirining qurulushi lagérlar mesilisini ret qilghili bolmaydighan deliller bilen teminleshte muhim rol oynaydighanliqini bildürgen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.