“чикаго мунбири”:“миңлиған уйғурлар ғайиб болуп кәтмәктә!”

Мухбиримиз әзиз
2017.12.18

Уйғурлар дияриниң нөвәттики әһвалида әң гәвдилик болуватқан бир һадисә миңлиған кишиләрниң “аҗайип-ғарайип” әйибләшләр билән қолға елиниши һәмдә тезла ғайиб болуп кетиши икәнлики диққәт қозғимақта. Америкидики әң чоң гезитләрдин бири болған “чикаго мунбири” ниң бу һәқтики мәхсус сәрләвһилик мақалисидә мушу мәсилә нуқтилиқ муһакимә қилиниду.

18- Декабир күни елан қилинған бу мақалида уйғурлар диярида қолға елинғанларниң мәҗбурий йосунда чәтәлдин қайтип кәлгәнләр болсун яки районниң өзидин қолға елинғанлар болсун бирдәк сотланмастинла мәхпий йосундики “өгиниш мәркәзлири” гә йиғивелинидиғанлиқи, уларниң җинайитини “әсәбийлик идийәсидә болуш” тин тартип чәтәлгә чиқип оқушқа қәдәр һәммила сәвәбкә четишқа болидиғанлиқи қәйт қилиниду.

Мақалидә бу һалниң чен чүәнго 2016-йили уйғурлар дияриға партком секретари болуп йөткилип кәлгәндин кейин оттуриға қойған “террорчиларни хәлқ уруши окяниға ғәрқ қиливетиш” шоаридин кейин әвҗ алғанлиқи тәкитлиниду.
Мақалида нөвәттики “сиясий өгиниш мәркәзлири”ниң вәкиллик үлгиси сүпитидә корла шәһиридики “һәқсиз, ташқи дуня билән пүтүнләй алақиси үзүлгән, һәрбий түрүм характергә игә” болған тәрбийәләш курслири мисал елиниду. Әмма бирләшмә агентлиқниң мухбирлири корладики бирнәччә “өгиниш мәркәзлири”ни зиярәт қилғанда уларниң пүтүнләй түрмә шәклини алған муәссәсә икәнликини көргәнликини ейтиду. Мухбирларниң пәризичә, сотқа чиқмастинла ғайиб болуп кетиватқан миңлиған уйғурлар дәл мушундақ җайларда солақта икән.

Мақалидә ейтилишичә, чен чүәнгониң ишханиси һәмдә “шинҗаң уйғур аптоном районлуқ һөкүмәт” мухбирларниң соалиға җаваб бәрмигән болсиму, хотән вилайәтлик һөкүмәтниң тәшвиқат бөлүмидин бав чаңхуй: “биз мушундақ тәдбирләрни алмисақ нәччә йилниң алдида болғандәк нәччә йүз адәм өлидиған иш қайта йүз бериду” дегән. Канададики уйғур паалийәтчи руқийә турдуш болса мухбирларниң бу һәқтики соалға: “һазир өчмәнлик вә қисас истики от болуп йениватиду. Әмма уйғурларға барар җайму қалмиған әһвалда ‛террорлуқ‚ ниң ямриши қандақму мумкин болсун?” дегән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.