Xelq'ara kechürüm teshkilati xitayning ghayib qiliwétilgen Uyghur tijaretchi abdughéni qadirni qoyup bérishini telep qildi

Xelq'ara kechürüm teshkilati 8-iyun küni xitayning chong tutqunida ghayib bolghan yene bir Uyghur toghrisida chaqiriq élan qilip, uning ehwalini ashkarilashni we qoyup bérilishini telep qildi.

Qeshqerdiki éléktr aptomobilliri tijaretchisi abdughéni qadir 2017-yili 4-ayda ghayib bolghan. Uning a'ilisidikiler bashqilar arqiliq uning shu yili 7-ayda mexpiy sotlinip, 7 yilliq késilgenlikidin xewer tapqan. Lékin da'iriler uning qandaq jinayet bilen eyiblengenliki heqqide héchqandaq uchur bermigen. Xelq'ara kechürüm teshkilatining tekitlishiche, abdughéni qadirning ehwali zor endishe peyda qilmaqta iken.

Xelq'ara kechürüm teshkilati chaqirida kishilerni Uyghur aptonom rayonluq türma bashqurush idarisining bashliqi wang jyanggha xet yézip, abdughéni qadirning “Xelq'ara ölchemlerde étirap qilin'ghan birer jinayet sadir qilghanliqigha a'it toluq, ishenchlik we qayil qilarliq deliller bolmisa, qoyup bérilishi, uning xelq'ara ölchemler boyiche adil sotlinishigha kapaletlik qilinishi” ni telep qilishqa chaqirghan. Mezkur teshkilatning tekitlishiche, “U qoyup bérilgiche uning a'ilisi bilen körüshüshi, adwokat teklip qilishi, qiyin-qistaq we qopal mu'amilige uchrimasliqigha kapaletlik qilinishi kérek” iken.

Abdughéni qadirning tutqun qilinishigha uning 2016-yili misirni ziyaret qilishi we özi bilen misirgha barghan kishilerning ayropilan bélitini élip bérishi seweb bolghanliqi ilgiri sürülmekte. Xelq'ara kechürüm teshkilatining bildürüshiche, xitayning tutqunida yene uning misirda oquwatqan küy'oghli ilyasjan raxmanmu ghayib bolghan. U misir da'irilirining 2017-yili 7-ayda misirdiki Uyghur oqughuchilirini tutqun qilip, xitaygha ötküzüp bérish weqeside ghayib bolghan iken. Uning ayali ilyasjan raxmanning lagérda ikenlikini bildürgen.