Ataqliq ressam ghazi emet 84 yéshida wapat boldi

Muxbirimiz ümidwar
2017-11-26
Élxet
Pikir
Share
Print

Uyghur hazirqi zaman ressamliq sen'itining bashlamchiliridin biri, bu sahediki yétekchi ustaz, ataqliq Uyghur ressami ghazi emet ependi 26-noyabir küni ürümchide 84 yéshida wapat bolghan.

Ghazi emet ependining wapati Uyghur diyarining ichi-sirtidiki Uyghurlarni qayghugha chömdürgen bolup, chet'ellerdiki Uyghurlar bu xewerni anglighandin kéyin, feysbok we bashqa ijtima'iy alaqe torliri arqiliq özlirining ghazi emetning wapatigha bolghan teziyelirini tushmu-tushtin bildürüshti we uning Uyghur ressamliq sen'iti hem medeniyitige qoshqan töhpilirini yuqiri bahalashti. 

Ghazi emetning terjimihaligha a'it matériyallardin qarighanda, u, 1933-yili, qeshqerde tughulup, bashlan'ghuch ma'arip terbiyisini qeshqer shehiride alghandin kéyin, 1951-yili qeshqer darilmu'ellimin'ge oqushqa kirgen we bu mektepni püttürgendin kéyin, 1954-yili "Shinjang instituti" ning sen'et fakultétigha oqushqa kirip, 1957-yili oqushni tamamlap, shu mektepte oqutquchi bolup xizmet qilghan. 

Ghazi emet asasliqi may boyaq resimliri saheside Uyghur diyaridin halqip, xitay may boyaq ressamliqidiki yétekchilerning birige aylan'ghan we bu sahediki talanti hem zor netijiliri bilen xitay ressamlar jem'iyitining mu'awin re'isi, xitay döletlik may boyaq resimliri akadémiyisining ezasi qatarliq orunlargha érishken.

Köp yillar "Shinjang sen'et instituti" ni bashqurghan we Uyghur aptonom rayonluq ressamlar jem'iyitining re'islik wezipisini atqurghan proféssor ghazi emet ependining érishken nam-sherepliri hem imtiyazlirining uning ressamliq sahesidiki yuqiri talanti we zor shöhritidin kelgenlikini ilgiri sürgen amérikida yashawatqan, tonulghan Uyghur kino rézhissori, sha'ir tahir hamut ependi merhumning wapatigha chongqur teziye bildürüp؛ "U bügünki zaman Uyghur ressamliqining shekillinishi we rawajlinishi üchün zor hesse qoshqan dangliq ressam. Uning ré'alistik uslubidiki nurghun resimliri Uyghur milliy hayatining her qaysi tereplirini eks ettürüp, Uyghur medeniyitining bayanigha we terkibi qismigha aylinip ketti" dédi. 

Tahir hamut ependi ghazi emetning sen'et institutini bashqurghan mezgilde köp sandiki Uyghur ressamliri, muqamchiliri, muzikantliri we bashqa sahediki sen'etkarlirining yétiship chiqishi hem Uyghur sen'itini rawajlandurushta ching turup, zor küch chiqarghanliqi üchün xelqning yuqiri hörmiti we qedirlishige érishkenlikini mu'eyyenleshtürdi. 

Ghazi emet yaratqan 11-esirde ötken büyük namayendiler - mexmut qeshqeriy we yüsüp xas hajipning portrétliri xelq'araliq ehmiyetke ige bolup, u yaratqan mezkur ikki zatning süriti köp ellerde étirap qilinishqa érishken. Uning "Muqam" we bashqa Uyghur milliy medeniyiti we turmush örp-adetlirini eks ettüridighan resimliri xelq'ara xaraktérlik qarshi élishqa hem mukapatlargha sazawer bolghan idi.

Toluq bet