Amérika xitaydiki puqralirini ghelite awaz hujumidin agahlandurdi

Muxbirimiz shöhret hoshur
2018-05-23
Élxet
Pikir
Share
Print

Amérikining xitaydiki elchixanisi bügün bir uqturush tarqitip, xitayda turuwatqan amérikiliqlarni ghelite awaz hujumigha pexes bolush heqqide agahlandurdi.

Uqturushtin melum bolushiche, amérikining gu'angjudiki konsulxanisining bir xizmetchisi bultur yil axirida qulaq tüwide ghelite bir awaz peyda bolush bilen yénik halda ménge zeximlinish alamiti körülgen. Konsulxana bu zexmilinishning sewebini tekshürüsh üchün mezkur xadimni amérikigha yolgha salghan.

Elchixana bügünki bu uqturushida, öz xizmetchisi xitayda yoluqqan bu ghelite awaz hujumini 2016-yili kubada yüz bergen awaz hujumigha oxshitishqa bolmaydighanliqini, emma tekshürüsh jeryanda her xil éhtimalliqning közde tutulidighanliqini bayan qilghan.

Xewerlerdin melum bolushiche, amérikining kubadiki bir elchixana xadimimu eyni chaghda ghelite awaz hujumigha uchrighan؛ bu sewebtin amérika shu chaghda kubani amérika elchixana xadimlirini qoghdimasliq bilen eyiblep, kubaning amérikidiki 16 neper diplomatini chégradin qoghlap chiqarghan idi. Kuba hökümiti u chaghda ghelite awaz hujumini inkar qilip, buning bir töhmet ikenlikini ilgiri sürgen.

Kanada hökümitimu ötken ayda kubadiki bir xizmetchisining ghelite awaz hujumigha uchrighanliqi we bu sewebtin kubadiki elchixana a'ile-tawi'abatini yötkep kétidighanliqini élan qilghan idi.

Xitaydiki amérika elchixanisining bügünki bu heqtiki uqturushida bayan qilishiche, xitay hökümiti amérika elchixanisigha mezkur hadise üstide tekshürüsh élip bériwatqanliqini éytqan؛ emma xitay tashqi ishlar ministirliki roytérsning bu heqte pikir bayan qilish telipige hazirghiche jawab qayturmighan.

Elchixana bügünki uqturushida xitaydiki öz puqalirini ghelite awaz hujumning alamitini bayqighanda, derhal turuwatqan ornidin bashqa orun'gha yötkilishni tewsiye qilghan.

Toluq bet