Ғәрбниң хитайға тайинишини азайтиш тиришчанлиқи утуқлуқ давам қилмақта

Вашингтондин мухбиримиз әркин тәйярлиди
2024.02.26

Америка, явропа иттипақи вә японийәниң тәминләш зәнҗирини көп хиллаштуруп, хитайға тайинишни азайтиш тиришчанлиқида зор утуқларға еришкәнлики вә буниң давамлишиватқанлиқини қәйт қилинмақта. “форбес” журнили 24-феврал елан қилған бир мақалидә көрситишичә, йеңи санлиқ мәлуматлар дунядики юқириқи чоң базарларниң хитай билән болған содисини көрүнәрлик азайтқанлиқини көрсәтмәктикән. Хәвәрдә дейилишичә, хитай сода ширкәтлири  юқириқилардин башқа  үчинчи дөләткә йөткилип, мәһсулатлирини бу дөләтләр арқилиқ експорт қиливатқан болуп, бу җәһәттики санлиқ мәлуматлар бир аз көптүрүлгәндәк қилсиму, әмма  хитайға тайинишни азайтишниң утуқлуқ давам қиливатқанлиқиниң бир реаллиқ икәнлики билдүрүлгән.

“форбес” журнилиниң қәйт қилишичә, бу санлиқ мәлуматлардики әң диққәт қозғайдиған нуқта, хитайниң америкаға әң көп мәһсулат експорт қилидиған дөләт болуштин қелип, униң орнини мексикиниң игилиши болған. Америка башчилиқидики ғәрбниң хитай билән болған гео-истратегийә, технологийә, сода мәсилилиридики ихтилаплири, уйғур, хоңкоң мәсилилирини өз ичигә алған кишилик һоқуқ вә тәйвән мәсилилиридики ихтилапи, хитайниң хәлқара тәртипкә ашкара хирис қилиши, шундақла тәминләш зәнҗиридики монополлуқ орнини козир қилип ишлитиши ғәрбниң хитайға тайинишни азайтишини тезләткән. “форбес” журнилиниң ейтишичә, бу хил өзгиришни америкалиқларниң импорт қилишта башқа мәнбәләргә, болупму мексика, вийетнам, һиндистан қатарлиқ дөләтләргә йөлиниши пәйда қилмақта.

Мақалида йәнә хитайниң таможна даирилириниң санлиқ мәлуматлиридин нәқил кәлтүрүп, 2023-йили 11-айғичә америкиниң хитайдин янфон импорт қилиши 10 пирсәнт, хатирә компютериниң 30 пирсәнт азайғанлиқи билдүрүлгән. “форбес” журнилиниң қәйт қилишичә, явропа базириниң бу җәһәттики санлиқ мәлумати толуқ болмисиму, әмма дәсләпки санлиқ мәлуматлар өткән йили германийәниң хитайдин мәһсулат импорт қилиши 13 пирсәнт азайғанлиқи, америкиниң германийәгә мәһсулат експорт қилишта хитайдин ешип кәткән болуши мумкинликини көрсәтмәктә икән.    

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.