"ғәрбий район пилани"намида йәнә 1800 хитай стодентниң уйғур елиға йетип келиши диққәт қозғиди

Мухбиримиз меһрибан
2015-07-31
Share


30 - Июл пәйшәнбә күни "ғәрбий район пилани"намида йәнә 1800 нәпәр хитай оқуғучиниң уйғур елиға йетип келиши, чәтәлләрдики уйғур тәшкилатлири вә уйғур вәзийитини көзәткүчиләрниң диққитини қозғиди.

Дуня уйғур қурултийи баянатчиси дилшат ришит бу һәқтә тохтилип,"бу 28 - июл хитай даирилири биңтүәнниң 14дивизийисигә орунлаштурған аталмиш "ғәрбий районға ярдәм бәргүчи пидаийлар" дин кейин, бир һәптә ичидә 2 - түркүм хитайларниң шәрқий түркистандики иш орунлириға орунлаштурулуши. Шәрқий түркистанда ишсизлиқ еғирлишип, нәччә он миң уйғур университет оқуғучилири ишсиз қелип, наразилиқ күчийиватқанда, райондики азғина иш пурсәтлириниң хитайларға берилиши, йәрлик уйғурларниң наразилиқини техиму күчәйтип, район вәзийитини мурәккәпләштүриду" деди.

Хитайниң хәвәрләр ториниң 31 - июл җүмә күнидики хәвиридин мәлум болушичә, 30 - июл күни хитайниң 27 өлкисидин "ғәрбий район пилани" бойичә кәлгән 1800 нәпәр пидаий уйғур аптоном райониниң һәр қайси җайлиридики иш орунлириға йүрүп кәткән. Хитай хәвәрлиридин мәлум болушичә, "ғәрбий район пилани" йолға қоюлғандин буян, уйғур аптоном районидики йәрликкә кәлгән "пидаийлар" 11 миң 666 нәпәр, биңтүәнгә кәлгән "пидаийлар" 6458 нәпәргә йәткән. 10 Йил ичидә буларниң көп қисми давамлиқ ишләш үчүн уйғур елида қелип қалған.

Қурултай баянатчиси дилшат ришитниң билдүрүшичә, "хитай даирилири йеқинқи 10 йилдин буян шәрқий түркистанға түркүм - түркүм хитай көчмәнлирини йөткәшни җиддийләштүргән. Аталмиш мәбләғ салғучилар, пидаийлар, пахтикарлар, техниклар, деқанчилиқ маһирлири дегән намларда йәрләштүрүлгән хитай көчмәнлириниң сани хәвәрләрдә ашкариланған болсиму, әмма йәнә башқа намларда түркүм - түркүмләп шәрқий түркистанға йөткәп келинип йәрләштүрүлүватқан хитай көчмәнлири аллиқачан, уйғурларниң ишсизлиқ ниспитиниң ешиши, мал - баһасиниң өрлиши, хитай нопоси көпийип уйғур нопосиниң шалаңлишишидәк вәзийәтни шәкилләндүрүп, уйғурларниң наразилиқи вә қаршилиқ һәрикәтлириниң тохтимаслиқиға сәвәб болуватқан асаслиқ амилларниң бири" һесаблинидикән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт