Хитайниң ғулҗа билән ақсуни төмүрйол арқилиқ туташтуруш пилани йеқинда иш башлайду

Мухбиримиз әркин
2020-04-24
Share

Хитай даирилириниң уйғур диярини өзгәртиш пиланиниң бир қисми болған ғулҗа билән ақсуни төмүрйол арқилиқ туташтуруш пилани ашкариланди.

«Тәңритағ» ториниң билдүрүшичә, мәзкур қурулушниң бир қисми болған арал-ақсу төмүрйол қурулуши бу йил 5-айда башлайдикән. 114 Километир узунлуқтики бу төмүрйол қурулушиға 3 милярд 500 милйон мәбләғ аҗритилған. Хитай таратқулириниң бу һәқтики хәвәрлиридә, бу қурулуш «биңтуәнниң җәнубқа кеңийишини тезлитип, төмүрйол линийәсигә җайлашқан шәһәр, наһийәләрдики санаәт районлириниң мал алмаштурушида муһим рол ойнайдикән».

Хитай һөкүмити 2017-йили уйғурларни кәң көләмлик тутқун қилип, лагерларға қамаш билән бир вақитта, нурғун карханиларни бу наһийә, шәһәрләргә йөткәп чиқип, «ешинча әмгәк күчлирини ишқа орунлаштуруш» намида лагерлардики нурғун уйғурларни бу карханиларда мәҗбурий әмгәккә селишқа башлиған. Униң бу һәрикити мәҗбурий әмгәкни чәкләш тоғрисидики алақидар хәлқара қанунларға хилап, дәп әйибләнгән. Бәзи хәлқара ширкәтләр кишилик һоқуқ тәшкилатлириниң бесимида райондики бу завутлар билән болған мал тохтамлирини бикар қилғаниди.

«Тәңритағ» ториниң хәвиридә илгири сүрүлүшичә, арал-ақсу төмүрйол қурулуши хитайниң уйғур диярида «төт тик, төт тәкши» төмүрйол тори бәрпа қилиш пиланидики алтай-қарамай-ғулҗа-ақсу төмүрйолиниң бир һалқиси болуп, әгәр бу төмүрйол пүтсә алтайдин йолға чиққан пойиз үрүмчи, турпанни айлинип өтмәй қарамай, ғулҗа арқилиқ удул ақсу вә аралға баралайдикән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт