“Zimistan tori” ghuljidiki bir lagér heqqide yéngi pakitlarni ashkarilidi

Uyghur diyaridiki tutup turush lagéri heqqidiki uchurlar köplep ashkariliniwatqan mezgilde, ghulja shehiri yéngiyer yézisidiki melum bir “Terbiyelep özgertish” lagérigha munasiwetlik yéngidin bayqalghan pakitlar “Zimistan tori” teripidin yene bir qétim otturigha chiqqan.

“Zimistan tori” ning 11-dékabirdiki xewiridin melum bolushiche, ghulja shehiri yéngiyer yézisidiki terbiyelesh mektipide tutup turuluwatqan tutqunlar we xizmetchiler choqum ri'aye qilishqa tégishlik bir yürüsh qa'ide-tüzümler alahide yorutup bérilgen.

Tutqunlargha da'ir mezmunda asasliqi tutqunlarning uruq-tughqanliri bilen téléfon alaqisi qilghanda emel qilishqa tégishlik qa'idiler, yeni téléfon qilish waqti besh minuttin éship ketmeslik, téléfon qilishtin burun xizmetchi xadimlargha tizimgha aldurush. . . Qatarliqlar öz ichige élin'ghan.

Xizmetchi xadimlargha békitilgen tüzüm bolsa her da'im toluq qorallinish, bina ichining bixeterlikini toluq kapaletke ige qilish. . . Qatarliqlar iken.

“Zimistan tori” 26-noyabir küni yuqirida déyilgen lagérining ich körünüshi tepsiliy süretke élin'ghan bir sin körünüshni tarqatqan idi.

Bezi közetküchilerning bildürüshiche, xitay hökümitining lagérlarni taqash u yaqta tursun, belki uni dawamliq kölemleshtürüshke qarap yüzlendürüshi Uyghurlarning bundin kéyinki weziyitining téximu nacharlishidighanliqidin dérek béridiken.