Kanada, gollandiye qatarliq döletlerdiki Uyghurlar "Ghulja weqesi" ning 22 yilliqi munasiwiti bilen namayish qildi

Muxbirimiz erkin
2019-02-06
Élxet
Pikir
Share
Print

Kanada, gollandiyediki Uyghurlar 5- we 6‏-féwral künliri kanadaning birqanche shehiride we gollandiye paytexti amistérdamda "Ghulja weqesi" ning 22 yilliq munasiwiti bilen namayish ötküzüp, yighiwélish lagérlirini taqash, iz-déreksiz yoqalghan Uyghurlarning aqiwitini sorash, parlamént we hökümetlerning Uyghur mesilisige jiddiy qarishini telep qildi.

Kanadadiki namayish 5‏-féwral küni toronto, wankowér we montéri'al sheherliride ötküzülgen. Torontodiki namayishta texminen birer yüzdek Uyghur mezkur sheherning dondas meydanigha yighilip, lagérlarni taqash, tutqunlarni qoyup bérish, Uyghurlargha qarita élip bériliwatqan "Étnik tazilash" ni toxtitishqa da'ir sho'arlarni towlighan we teshwiqat wereqilirini tarqitip, kanada puqralirini yardemge chaqirghan.

"Kanada sherqiy türkistan jem'iyiti" ning re'isi tuyghun abduweli 6‏-féwral muxbirimizgha eskertip, "Bu namayish kanada parlaméntining Uyghur mesilisige arilishishigha türtke bolushini ümid qildi" dédi.

Gollandiyediki Uyghurlar 6‏-féwral küni gollandiye parlaménti aldida namayish qilip, gollandiye parlaménti we hökümitining Uyghur rayonida ghayib bolghan a'ile ezalirining iz-dérikini qilishni telep qilghan. Texminen 70 dek adem qatnashqan mezkur namayishni gollandiyediki "Sherqiy türkistan teshkilatlar munbiri" teshkilligen.

Namayish yétekchilirining biri, "Nida axbarat tori" ning rehbiri abdusalam ependining radiyomizgha bildürüshiche, namayish jeryanida gollandiye xristi'an démokratlar partiyesining parlamént ezasi martén ependi chiqip ular bilen körüshken.

Gollandiyediki Uyghurlar ötken yili gollandiye da'irilirige Uyghur rayonida ghayib bolghan 254 neper a'ile ezasining tizimlikini tapshurup, parlamént we hökümettin ularning iz-dérikini qilishni telep qilghan idi.

Abdusalamning bildürüshiche, martén ependi namayishchilargha melumat bérip, özlirining bu toghrisida xitay bilen ikki qétim uchrashqanliqi, lékin héchqandaq jawab alalmighanliqini bildürgen. U, lagérlarning intayin zor mesile ikenliki, shunga bu mesilini yawropa ittipaqi bilen birge hel qilidighanliqi, shundaqla gollandiyediki Uyghurlarning medeniyiti we ana tilini saqlap qélishigha yardem béridighanliqini tekitligen.

Toluq bet