Xitay gérmaniyediki putbol musabiqiside tibet bayriqining chiqirilishigha naraziliq bildürdi

Muxbirimiz shöhret hoshur
2017.11.20

Ötken shenbe küni gérmaniyening maynéz shehiride putbol musabiqisi ötküzülgen. Mezkur musabiqige qatnishiwatqan xitay yashlar komandisi tamashibinlar arisida tibetlik we tibetlerni qollighuchilar bolup 6 kishining tibet bayriqini chiqarghanliqini körüp, musabiqini toxtitip meydandin yamanlighan péti chiqip ketken.

Igilinishiche, xitay yashlar komandisi peqet xitaygha qarshi lozunkilar yighishturulghandin kéyinla musabiqini dawamlashturghan. Bügün xitay tashqi ishlar ministirliqining bayanatchisi lu kang bayanat élan qilip, xitayning herqandaq bir dölet we shexsning tibet musteqilliqini qollaydighan herqandaq shekildiki “Térrorluq we bölgünchilik herikiti” ge qet'iy qarshi turidighanliqini bildürgen.

Gérman saqchiliri bu heqte axbaratchilargha bergen jawabida putbol meydanida xitay bayriqining lepildishige ruxset qilin'ghan'gha oxshashla bashqilarningmu öz bayriqini chiqirishigha ruxset barliqini éytqan. Gérmaniye putbolchilar birleshmisining mes'uli romy zimmérmen, “Biz putbol meydanidiki naraziliq lozunkilirigha cheklime qoyalmaymiz, chünki bizde ipade erkinliki bar hem bu heqte belgilik qa'ide-tüzümlermu bar,” dégen.

Putbol meydanida bayraq chiqarghan tibetlikler bolsa, özlirining bayriqi we xitaygha bolghan naraziliqini ipadileydighan lozunkiliri arqiliq xitayning tibetni bésiwélishigha we u yerdiki kishilik hoquq depsendichilikige qarita naraziliqini bildürgenlikini bayan qilghan.

Melum bolushiche, xitay 2020‏-yili tokyoda ötküzülidighan olimpik tenheriket yighinigha teyyarliq üchün qatnishiwatqan bu musabiqisining yene bir qétimliqi frankifortta ötküzülidiken. Igilinishiche, gérmaniyediki alaqidar terepler xitayni putbol meydanidiki naraziliq heriketlirige qarita könglide teyyarliq bolushi lazimliqini we weziyetke salmaqliq bilen mu'amile qilishqa dewet qilghan iken. 

Xitay putbolchilar yamanlap toxtitiwalghan mezkur musabiqide reqibige 3:0netije bilen utturup qoyghan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.