Голландийәниң ейнховен шәһиридики “хитай мәдәнийәт өйи” қурулуши уйғур мәсилиси сәвәблик муназирә қозғиди

Мухбиримиз әркин
2019-10-28
Share

Голландийәниң әйнховен шәһиридики 2 милйон долларлиқ “хитай мәдәнийәт өйи” уйғур мәсилиси сәвәблик муназирә қозғиған. Хитайниң нәнҗиң шәһири пул чиқиришни үстигә алған мәзкур қурулуш шәһәрлик парламентта уйғур мәсилиси сәвәблик өктичи партийәниң қаршилиқиға учриған.

“ейинховен хәвәрлири” ториниң ашкарлишичә, денк партийәниң ейинховен шәһәрлик парламенттики гурупписиниң башлиқи адәм топдағ сөз қилип, хитай тәминлигән мәбләғниң мәқсити гуманлиқ икәнлики, хитайниң кишилик һоқуқни дәпсәндә қиливатқанлиқи вә уйғурларни бастуриватқанлиқини оттуриға қойған. У, хитайниң бастуруши уйғур райони билән чәклинип қалмиғанлиқи, буниң ейинховендики уйғурларғиму йетип кәлгәнлики, шәһәр башлиқи җон җорритсманиң бу шәһәрдики уйғурларниң “бихәтәрликигә қандақ капаләтлик қилидиғанлиқи” сориған. Униң илгири сүрүшичә, ейинховен билән нәнҗиң шәһриниң “қериндаш шәһәрлик мунасивити пәқәт иқтисадий мәнпәәти асасиға қурулса, хитайниң уйғурларға селиватқан зулуми тилға елинмиса, бундақ қурулушниң һечқандақ әһмийити йоқ” икән.

У йәнә, әгәр җон җорритсма хитайни зиярәт қилип қайтқанда өзлиригә бу тоғрисида мәмнун қиларлиқ бир җаваб бәрмисә, парламентта мәзкур қурулуш пиланиға рәт авази беридиғанлиқи, һәтта нәнҗиң билән болған қериндаш шәһәр мунасивитини бикар қилиш тоғрисида тәклип лаһийәси сунидиғанлиқини билдүргән. “ейинховен хәвәрлири” ториниң хәвиридә қәйт қилинишичә, җон җорритсма адәм топдағниң сөзигә қарита хитайда кишилик һоқуқниң дәнсәндичиликкә учраватқанлиқидин әпсуслинидиғанлиқи, бирақ өзиниң хитай зияритидә уйғур мәсилисини қоймайдиғанлиқини тәкитлигән. У, бу мәсилә “мәркизи һөкүмәт вә ташқи ишлар министирлиқиға бағлиқ. Бу шәһәрлик һөкүмәтниң вәзиписи әмәс” дегән. Хәвәрдә көрситилишичә, җон җорритсма өзиниң бу мәсилини оттуриға қойған тәқдирдиму, нәнҗиң шәһриниң бейҗиң һөкүмитини көрситип қойидиғанлиқи, уйғурлар бастурушқа учраватқан районниң нәнҗиң шәһиригә 4 миң километир келидиған йирақ җай икәнликини илгири сүргән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт