Gorbachow dunyani yéngi soghuq munasiwetler urushi bilen agahlandurdi

Sabiq sowét ittipaqi rehbiri, 83 yashliq mixayil gorbachow bérlin shehiride ötküzülgen bérlin témining yiqitilghanliqining 25 yilliqini xatirilesh pa'aliyitide söz qilip, dunyaning qaytidin soghuq munasiwetler urushi bosughisida turiwatqanliqini tekitlidi.

Roytérsning xewer qilishiche, gorbachow “Nöwette dunya yéngi soghuq munasiwetler urushi girwikide turmaqta. Hetta beziler uning alliqachan bashlinip bolghanliqini éytishmaqta” dégen hemde gherb döletlirini rusiye bilen di'alog ötküzüsh arqiliq hazirqi jiddiylikini axirlashturushni otturigha qoyghan.

Gorbachow sözide “Yawropa we ottura sherqtiki qanliq toqunushlar, dunya qudretlik döletliri arisidiki di'alogning üzüp tashlinishi qattiq endishe peyda qilidu” dep tekitligen.

Mixayil gorbachow rusiye hökümitige wakaliten bu pa'aliyetke qatnashti.

Gorbachow sowét ittipaqining tunji we axirqi prézidénti bolup, u 1989 - yilidiki bérlin témining yiqitilishi we 1991 - yilidki sowét ittipaqining yimirilishide hel qilghuch rol oynighan idi. U yéqinqi waqitlardin buyan qirim we ukra'ina mesilisi tüpeylidin gherb bilen rusiye arisida peyda bolghan jiddiylikler üstide pikir bayan qilghan idi we özining rusiye - gherb munasiwetlirining téximu nacharliship kétishige bolghan endishisini bildürgen idi.