Гордон чаң: “2022-йили америка хитайға қарита немиләрни қилиши лазим?”

Мухбиримиз әзиз
2022-01-04
Share

Хитай һәққидики тәтқиқатта ғәрб дунясида көзгә көрүнгән сиясий анализчи гордон чаң 4-январ күни мәхсус обзор мақалиси елан қилип америка һөкүмити 2022-йили хитайға қарита немиләрни қилиши лазимлиқи һәққидә тохталди.

Мақалида ейтилишичә, җов байден 2021-йили мартта өзиниң ташқи сиясәт һәққидики сөзидә хитайни “бизниң әң асаслиқ риқабәтчимиз” дәп көрсәткән. Һалбуки хитай һөкүмити 2019-йилидин башлапла хитайдики әң чоң гезит болған “хәлқ гезити” ни сорун қилған һалда америкаға қарши “хәлқ уруши” ни башливәткән. Йәнә келип хитай һөкүмити мушу хил америкаға қарши тәшвиқатни қанат яйдуруп өзлириниң америка һөкүмитигә һуҗум қилишиға пайдилиқ кәң җамаәт пикири һазирлиған. Уларниң бу хил дүшмәнлик һессяти бүгүнгичә шунчә ашкара ипадилиниватқан болсиму америка һөкүмити буниңға қарита тегишлик ‍инкас қайтурмиған. Апторниң қаришичә, дәл мушу сәвәбтин хитай рәиси ши җинпиң америкини унчә қудрәтлик, дәп қаримас болувалған.

Аптор мушу әһвалларни омумлаштуруп нөвәттики бир йилниң америка үчүн бәкму муһимлиқини, навада америка давамлиқ һалда дәриҗидин ташқири қудрәт саһиби болушни истисә бу хил қудрәт саһиби болуш пурситиниң хитайға өтүп кетишидин сақлиниши керәкликини, ундақ болмиғанда хитайниң дуняни контрол қиливелиши әмәлгә ашидиғанлиқини тәкитләп “әгәр хитай дуняниң хоҗисиға айлинип болғанда америка үчүн уни контрол қилиш мумкин болмай қалиду” дәп көрситиду.

Апторниң қаришичә, хитайниң әһвали нөвәттә хирқирап қалған сәвийәгә чүшүп қалған болуп қәрз кризиси, иқтисадий тәвриниш, йемәклик қисинчилиқи, муһит бузғунчилиқи, шундақла таҗсиман вирусни контрол қилишқа илаҗсиз қелиш қатарлиқлар хитайни уруш болмиған дәврдики әң начар вәзийәткә гириптар қилмақтикән. Йәнә келип 2065-йилиға барғанда хитай нопусиниң аз дегәндиму йерими йоқилиш алдида турмақтикән

Гордон чаңниң қаришичә, хитайни кекирдикидин боғидиған бу хил иқтисадий козирни әмәлгә ашурушта пулниң хитайға еқишини тосуш бәк муһим икән. Буниң үчүн хитай базириға вә хитай санаәт дунясиға мәбләғ селишни чәкләш, йеник санаәт ишләпчиқириш базилирини хитайдин оттура америка райониға йөткәш, шундақла хитайни йәнә бир қетим қутулдуруштин сақлиниш әң муһим икән. Чүнки америка һөкүмити “мәдәнийәт инқилаби” да һалидин кәткән хитайни 1972-йили никсонниң қоли арқилиқ, “тйәнәнмен қирғинчилиқи” дин кейин малиманға петип қалған хитайни 1989-йили җорҗ бушниң қоли арқилиқ, иқтисадта хараплишиш алдида турған хитайни 1999-йили килинтонниң қоли арқилиқ үч қетим қутулдурувалғаникән. У мушу әһвалларни әслитип “америкалиқлар немишқа хитайниң авиаматка ясишини мәбләғ билән тәминлиши, уйғур қирғинчилиқини қоллиши яки кейинки нөвәтлик вабаға мәбләғ селиши лазимкән?” дәп соал қойиду.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт