Ройтерс агентлиқи: "хитайниң мусулман гулаглириниң изиға чүшүш" намлиқ доклат елан қилди

Мухбиримиз әркин
2018-11-30
Share

Ротерс агентлиқи америкидики "ерсрайс" (Earthrise) намлиқ бир сүний һәмраһ рәсимлирини анализ қилиш оргини билән хитайниң уйғур районида қурған 39 орундики йиғивелиш лагериниң қурулуши вә кеңәйтилиш әһвалини анализ қилип, узун һәҗимлик бир ахбарат доклати елан қилған.

Ахбарат доклатида баян қилинишичә, улар бу лагерлардики биналарни бирму-бир анализ қилиш арқилиқ бу лагерларниң қурулған дәсләпки мәзгилдики көлими 2017‏-йили 4‏-айдин 2018‏-йили 8‏-айғичә болған 17 ай ичидә 3 һәссә кеңәйгән. Ахбарат доклатида, улар анализ елип барған бу 39 лагерниң һазирқи омумий көлиминиң 140 путбол мәйданиға тәң келидиғанлиқи билдүрүлгән.

Ройтерс агентлиқи хитайниң уйғур районидики йиғивелиш лагерлириниң сүний һәмраһ рәсимлирини анализ қилип, униң көлими вә униңдики тутқунларниң сани һәққидә чоң һәҗимлик ахбарат доклати елан қилған 2‏-хәлқара ахбарат органидур. Буниңдин бурун әнглийә BBC агентлиқи лагерларниң сүний һәмраһ рәсимлирини вә нәқ мәйдан көрүнүшлирини анализ қилип чоң һәҗимлик ахбарат доклатида елан қилған иди.

BBC Ниң доклатида хитайниң үрүмчи әтрапиға җайлашқан даванчиңдики йиғивелиш лагериға 130 миң адәм сиғидиғанлиқи билдүрүлгән иди. Ройтерсниң ахбарат доклатида қәйт қилинишичә, улар уйғур районидики йиғивелиш лагери, дәп қаралған 7 орунға өзиниң мухбирлириға әвәткән. Мухбирлар бу орунларға йеқинлишишқа урунған болсиму, бирақ бу орунларни қоғлаватқан сақчилар буниңға йол қоймиған.

Ройтерсниң илгири сүрүшичә, улар анализ елип барған 39 орундики 39 йиғивелиш лагериниң ичидики көлими әң чоң йиғивелиш лагери корла шәһиридә икән. Ахбарат доклатида, корлидики мәзкур йиғивелиш лагериниң йеқинқи 17 ай ичидә 2 һәссә кеңәйгәнлики, униң бу йил 8‏-айда тартилған сүий һәмраһ рәсимидики омумий қурулуш көлиминиң 140 миң квадрат метирға йетип барғанлиқи илгири сүрүлгән.

Ахбарат доклатида йәнә мәзкур районниң бу вәзийити йеқиндин буян америка вә б д т ниң диққитини қозғашқа башлиғанлиқи, бәзи америка дөләт мәҗлиси әзалириниң чен чүәнго башчилиқидики бәзи хитай әмәлдарлирини җавабкарлиққа тартишни тәләп қилғанлиқи алаһидә тәкитләнгән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт