Гулбаһар хативаҗиниң лагер һаяти һәққидә йезилған китаби ингилизчигә тәрҗимә қилинған

Мухбиримиз җәвлан
2022-02-23
Share

Санақлиқ лагер шаһидлиридин гулбаһар хативаҗиниң лагердики ечинишлиқ кәчмишлири тема қилинған “хитай лагеридин һаят қалғучи” намлиқ китаби ингилизчигә тәрҗимә қилинған. Бу мунасивәт билән, американиң даңлиқ таратқулиридин бири болған америка аммиви радийоси (NPR) бу һәқтә мәхсус программа ишләп, гулбаһар ханимни зиярәт қилған. Гүлбаһар ханим бу радийо сөһбитидә өзиниң хитай һөкүмити тәрипидин чақиртилип тутқун қилинғанлиқи, түрмидә өткүзгән 2 йиллиқ паҗиәлик мәһбус һаяти, франсийә һөкүмитиниң ярдими билән қутулуп чиққан тәләйлик бир гуваһчи болуш сүпити билән дунядин күтидиған үмидлирини оттуриға қойған. Программа риясәтчиси нөвәттики вәзийәтни тилға елип, хитайниң олимпек сәтчилики вә русийәниң окраина иғвагәрчилики күчлүк қаршилиққа учраватқан бу күнләрдә, лагерларда қамақлиқ туруватқан уйғурлар паҗиәсиниң қайта диққәт қозғаватқанлиқини билдүргән.

Американиң грозийәдики әлчиханисиниң тор бетиму гулбаһар хативаҗиниң мәзкур китабини тонуштуруп мақалә елан қилған һәмдә китабтин бәзи җүмлиләрни нәқил алған. Мақалидә йәнә лагер шаһидлиридин меһригул турсунниң әслимиси йезилған “барса кәлмәс җай” намлиқ китабму тонуштурулған; герман тилида йезилған бу китаб бу йил январда нәшр қилинғаниди. Мақалидә билдүрүлүшичә, хитайдин қутулуп чиқалиған тутқунларниң һекайилири хәлқарада хели зор тәсир пәйда қилған. Кишиләр һаят қалған бу гуваһчиларниң паҗиәлик әслимиси арқилиқ хитай йошуруп кәлгән җинайәтләрни билгән вә униңға қарши һәрикәтлиниш сепигә қетилған.

Гулбаһар хативаҗиниң “хитай лагеридин һаят қалғучи” намлиқ китаби 2021-йил 3-айда франсозчә нәшр қилинған болуп, шу йили 7-айда “хитай лагеридин қандақ қутулдум?” дегән нам билән түркчигә тәрҗимә қилинғаниди. Буниңдин башқа меһригул турсун вә сайрагул савутбай қатарлиқ лагер шаһидлириниң әслимиси йезилған китабларму германчә, ингилизчә тилларда нәшр қилинған болуп, уйғурларға йүргүзүлүватқан қирғинчилиқ бу гуваһчиларниң лагердики кәчмишлири, паҗиәлик һекайилири арқилиқ дуняға тонулғаниди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт