Xelq'ara kechürüm teshkilati gülgine heqqide bayanat élan qildi

Muxbirimiz eziz
2018-06-21
Élxet
Pikir
Share
Print

Malaysiya téxnika uniwérsitétida oquwatqan Uyghur doktorant gülgine tashmemet 2017-yili 26-dékabir küni malaysiyadin yurti ghuljigha qaytqandin kéyin iz-déreksiz ghayib bolghan idi. 21-Iyun küni xelq'ara kechürüm teshkilati bu munasiwet bilen mexsus bayanat élan qildi.

Melum bolushiche, gülgine 2018-yili féwral éyida yéngi oqushni bashlimaqchi boluwatqan bolup, tetil qilish üchün yurtigha qaytqandin kéyin ushtumtut ghayib bolghan. Uning chet'eldiki hedisi we dostliri nöwette Uyghur diyarida jiddiy ijra boluwatqan siyasiy basturush heriketlirini, jümlidin chet'el bilen baghlinishliqi bolghan kishilerning nuqtiliq hujum nishani boluwatqanliqidek pewqul'adde ehwalni közde tutup "Gülgine siyasiy terbiyelesh merkizige élip kétilgen" dep texmin qilmaqta iken.

Xelq'ara kechürüm teshkilatining bayanatida xelq'ara jama'et xitaydiki alaqidar hökümet tarmaqlirigha bu heqte mektup yollap, gülginening iz-dérikini qilish chaqiriq qilin'ghan. Shuning bilen birge gülgineni tézdin qoyuwétish, uning jinayet ötküzgenlikige da'ir delil-ispat bolmighan ehwalda uninggha jinayet artmasliq, uning öz arzusi boyiche adwokat yallash hoquqigha kapaletlik qilish qatarliqlar jiddiy telep qilin'ghan.

Mezkur bayanatning axirida yene nöwette Uyghur diyarida ghayet zor kölemlik "Yighiwélish merkezliri" torining berpa bolghanliqi, "Esebiy" we "Siyasiy jehettin gumanliq" dep qaralghan kishiler, shuningdek chet'el bilen alaqisi bolghanlarning udul mushu merkezlerge solinip "Siyasiy jehettin özini özgertish" ke mejburliniwatqanliqi, buning bilen Uyghurlarning ghayet zor bohran'gha duch kéliwatqanliqi bayan qilin'ghan.

Toluq bet