Хитай һөкүмити сабиқ тутқун гүлнар обулни өз тәшвиқати үчүн сөзләткән

Мухбиримиз җәвлан
2021-02-03
Share

Америка һөкүмити хитайниң уйғурларға йүргүзүп келиватқан қәбиһ җинайәтлирини "ирқий қирғинчилиқ" вә "инсанийәткә қарши җинайәт" дәп бекиткәндин кейин, хитай һөкүмити буниңға қарши тәшвиқат уруши қозғиди.

3-Феврал хитайниң "хәлқ гезити" торида хитай ташқий ишлар министирлиқиниң уйғурлар мәсилиси тоғрулуқ өткүзгән мухбирларни күтивелиш йиғининиң тәпсилий мәзмуни елан қилинған. Униңда мәлум болушичә, хитай йәнә бир нәччә уйғурни ялған сөзлитип өзини ақлиған, һәқ-наһәқни астин-үстүн қилип хәлқара җәмийәтниң көзини бойимақчи болған. Сөзлигүчиләр ичидә қәшқәр университетиниң профессори гулнар обулму бар болуп, әркин асия радийоси уйғурчә бөлүминиң 2018-йил 9-айниң 7-күнидики ениқлиши давамида униң тутқун қилинғанлиқи дәлилләнгәниди. Бу хәвәр чиққандин кейин хитай даирилири гулнар обулни қоюп бәргән, һәтта униңға мәнсәп берип өз тәшвиқати үчүн пайдиллинип кәлгән. 2019-Йил 14-феврал күни гулнар обулниң бир баянати "тәңритағ тори" да елан қилинған. Бу баянаттиму гулнар обул "бөлгүнчилик, диний әсәбийлик вә террорлуқ идийәси" ни тарқитишқа урунған диний затлар вә зиялийларни қаттиқ әйиблигән.

Бу қетимқи баянатида гулнар обул өзиниң тутқун қилинғанлиқини инкар қилиш биләнла қалмай, "мән дуня уйғур қурултийи қатарлиқ ‹үч хил күч' ләрни қаттиқ агаһландуримән, уларниң мениң намим вә сүритимдин пайдилинип дуняни алдимисун, маңа, аиләмгә вә дөлитимгә зиянкәшлик қилмисун; болмиса мән қануний васитиләрдин пайдилинип, өзүмниң абруйи вә дөләтниң һөрмитини қоғдаймән," дәп баянат бәргән.

Анализчиларниң қаришичә, уйғурлар мәсилиси һәр қетим хәлқарада күчлүк бир долқун пәйда қилғанда хитай һөкүмити уйғур сәрхиллиридин бәзилири қоюп берип, уларни баянат елан қилишқа қистап кәлгән. Американиң бу қетимқи "ирқий қирғинчилиқ" баянатидин кейин, хитай һөкүмити уйғур райониниң һәр қайси җайлирида америка һөкүмити вә майк пампейони тиллаш һәрикити қозғапла қалмай, чәт әл мухбирлирини чақирип, бир нәччә тәшвиқат қурбанлирини ишқа селип, кона тәшвиқат оюнлирини ойнашқа башлиған. Көзәткүчиләрниң илгири сүрүшичә, буниңдин хитайниң өзлиригә бекитилгән җинайәттин нәқәдәр ғәзәбләнгәнлики вә хәлқарада сесиқ наминиң тарқилип кетишидин нәқәдәр қорққанлиқини көрүвалғили болидикән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт