Amérika hökümiti xitayni guy mingxeyni qoyuwétishke chaqirdi

Muxbirimiz ümidwar
2018-01-28
Élxet
Pikir
Share
Print

Xitay bixeterlik da'irilirining shiwétsiye puqraliqidiki xitay ziyaliysi, yazghuchi guy mingxeyni shiwétsiye diplomatliri aldida tutqun qilip élip kétishi shwétsiye we yawropa ittipaqining tenqidini qozghighan bolup, yawropa ittipaqi xitayni guy mingxeyni derhal qoyuwétishke chaqirghan idi. 27-Yanwar küni amérika dölet ishliri ministirliqimu bayanat élan qilip, özlirining xitay da'irilirining guy mingxeyni qayta tutush weqesige diqqet qiliwatqanliqini tekitligen.

Amérika awazining xewiridin melum bolushiche, amérika dölet ishliri ministirliqi élan qilghan bayanatta amérika we uning yawropa ittipaqidiki hemkarchilirining erkinlik, barawerlik we kishilik qedri-qimmiti jehette ortaq prinsipqa ige ikenliki, shunga amérikaning öz ittipaqchiliri we rayondiki teshkilatlar bilen birlikte xitayni kishilik hoquqqa hörmet qilishqa dewet qilidighanliqi eskertilgen. 

2015-Yili taylandtin xitay bixeterlik da'iriliri teripidin tutulup xitaygha élip kétilgen shiwétsiye puqrasi guy mingxey ikki yildin kéyin qoyup bérilip, ningpo shehirige orunlashturulghan we uning sheherdin ayrilmasliqi békitilgen idi. U bu yil 1-ayning 20-küni u shwétsiye diplomatliri bilen birlikte poyizda béyjinggha qarap mangghanda, puqrache kiyin'gen xitay bixeterlik xadimliri teripidin shiwétsiye diplomatliri aldidin tutup kétilgen idi. 

Yazghuchi guy mingxey 2004-yili xitaydin ayrilip, shwétsiyege bérip yerleshken we shiwétsiye puqrasi bolghan hem xitay musteqil qelemkeshler jem'iyitige eza bolghan idi. U xitay kompartiyisini tenqid qilidighan eserlerni yézip neshr qildurghan. 

Uyghur teshkilatliri guy mingxey weqesini tilgha élip, xitay bixeterlik da'irilirining chet'el tewelikide turup, Uyghurlarning siyasiy we kishilik hoquqliri üchün pa'aliyet qiliwatqan bir qisim Uyghurlar we ularning öz wetinidiki a'ile-jemetige türlük usullar bilen bésim qiliwatqanliqi inkas qilinmaqta.

Toluq bet