Уйғур һәрикити тәшкилатиниң тор бети хитайниң һуҗумиға учриди

Хитай һөкүмитиниң уйғурларға қарита иҗра қиливатқан чегра һалқиған зулум вә һуҗумлири йеқинқи йилларда барғансери әвҗигә чиқиватқанлиқи мәлум. Әнә шу хил һуҗумларниң бири 3-ноябир күни уйғур һәрикити тәшкилатини нишан қилған.

Мәзкур тәшкилатниң тор бети 3-ноябир күни намәлум хаккерларниң тор һуҗумиға учриған һәмдә пүтүнләй паләч һаләткә чүшүрүп қоюлған. Шуниң билән биргә тор бәт йүзидики барлиқ мәзмунлар өчүрүлүп, униң орниға хитай мәркизий һөкүмитиниң хәвәрлири чаплап қоюлған. Тәшкилатниң иҗраийә директори рошән аббас бу һәқтә X(тивиттер) бетидә учур йоллап, өзлириниң хитай һөкүмитигә қарши паалийәтлириниң бу қетимқи тор һуҗумиға сәвәб болғанлиқини әскәрткән. У бу һәқтә тохтилип: “хитай компартийәсиниң уйғурларни қирғин қилиштәк явузлуқлирини паш қилғанлиқимиз үчүн, хитай һөкүмити арқа тирәк болуватқан тор һуҗумиға учридуқ. Бу уларниң учурларни бастуруп қоюш вә контрол қилиш урунушиниң ипадиси” дегән.

Хитай һөкүмитиниң уйғурларни нишан қилған бу хилдики чегра һалқиған һуҗумлири тоғрисида “әркинлик сарийи”, шеффейлд университети, америка дөләт мәҗлиси қатарлиқ орунлар көплигән доклатларни елан қилған һәмдә гуваһлиқ йиғинлири чақирған иди. “америка-хитай истратегийәлик риқабәт пәвқуладдә комитети” ниң рәиси майк галлагер йеқинда бу һәқтә тохтилип: “мушуниң өзи әмәлийәттә хитай һөкүмитиниң америка қошма шитатлириниң игилик һоқуқиға дәхли-тәруз қиливатқанлиқиниң ипадиси” дәп көрсәткән иди.