Хитай һөкүмити бу йилқи һәҗ тавабчилириға "из қоғлиғуч" орнатмақчи

Мухбиримиз әзиз
2018-07-31
Share

Ислам диниға етиқад қилидиған уйғурлар үчүн бәкму муһим болған һәҗ паалийәтлири һәр йили хитай һөкүмитиниң қаттиқ контроллуқи астида тамамлинип кәлгәнлики мәлум. Йеқинда бу йилқи һәҗ паалийити үчүн һаҗиларға уларниң ениқ орнини көрситип беридиған "из қоғлиғуч" аппарати орнитилидиғанлиқи диққәт қозғиди.

Хитай һөкүмити башқурушидики "йәр шари вақти" гезитиниң 31-июлдики хәвиридә ейтилишичә, бу йилқи һәҗ тавабчилириға алаһидә лайиһиләнгән "из қоғлиғуч" әсваби есип қоюлидикән. Иккилик код чапланған бу әсвабқа шу кишиниң рәсими вә башқа тәпсилий учурлири киргүзүлгән икән. Мәлум болушичә, бу йилқи һәҗ паалийити үчүн 3300 һаҗиға мушу хилдики әсваб есип қоюлидикән. Әмма хәвәрдә бу кишиләрниң милләт тәвәлики ейтилмиған. Хитай ислам җәмийитидин бирәйлән бу һәқтә сөз қилип: "бу йеңи әсваб һаҗилиримизниң бихәтәрлики үчүн бәкму муһим. Чүнки биз бу арқилиқ һаҗилиримизниң конкрет орнини һәрқачан биләләймиз" дегән.

Түрлүк учурлардин мәлум болушичә, йиллардин буян һәҗгә барған уйғурлар хитай һөкүмити сәпләп қойған "алаһидә хадимлар" ниң қаттиқ назарити астида һәҗ паалийәтлирини тамам қилип кәлгән, шуниңдәк уларниң һәҗ паалийити җәрянида чәтәлләрдики уйғурлар билән алақидә болуши қаттиқ чәклинип кәлгән. Әмдиликтә бу хил йеңи усулниң қоллинилиши бир қисим паалийәтчиләрниң гуманини қозғаватқанлиқи мәлум. 

Әнглийәдики киң университетиниң профессори ева пилс бу һәқтә "вал-стрет журнили" гезитигә сөз қилип: "бу хитай һөкүмитиниң мусулманларға зиянкәшлик қилишиниң йәнә бир испати. Бу усул әмәлийәттә түрмиләрдики җинайәтчиләргә қоллинилиду" дегән. Германийәлик мутәхәссисләрдин адрян зенз болса һәҗгә илтимас қилғучиларниң қаттиқ таллаштин өтидиғанлиқини тәкитлигәч: "мушундақ турупму бу хитай һөкүмитиниң ашу һаҗилардин хатирҗәм болалмайватқанлиқини көрситиду" дегән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт